АҞӘА, ԥхынгәы 14– Sputnik, Бадраҟ Аҩӡба. Аестонцәа ирызку афильм ихнаркәшеит Аԥсны инхо еиуеиԥшым амилаҭқәа ирызкыз асиужетқәа рцикл "Культурное многообразие – богатство общества".
Апроект автор Розита Герман еиҭалҳәеит афильмқәа рҭыхра аидеиа ҵыԥх аӡынразы исызцәырҵит ҳәа.
"Сара избон иҭҵаам аинформациа дуӡӡа шыҟоу. Сыгәгьы иаанагеит ауаа аинтерес ркып ҳәа. Ҳара даара имаҷны аинформациа ҳамоуп егьырҭ амилаҭқәа, аобшьинақәа Аԥсны рынхашьазы", — лҳәоит лара.
Жәымзы рыҩныҵҟа иҭыхын жә-сиужетк.
"Аԥхьа аҭҵааратә усурақәа мҩаԥаагеит, нас ҳусура хацҳаркит", — лҳәоит Герман.
Апроект "Культурное многообразие – богатство общества" амотивқәа рыла аҵыхәтәантәи амш аҽны имҩаԥган ацәыргақәҵа.
"Ара шәара ижәбоит афотоҭыхыҩ Алан Воуба иҟаиҵаз апортреҭқәа. Ара еизгоуп ҳфильмқәа рфырхацәа зегьы. Ари ҳ-Аԥсны аҭоурых иахәҭакуп", — лҳәоит лара.
Саломеиа Кемулариа — апроект "Культурное многообразие – богатство общества" афырхацәа дыруаӡәкуп.
"Акультуратә еиԥшымзаара аинтерес ду аҵоуп иааигәаны уаназнеиуа. Розита Герман Аԥсны амилаҭтә культурақәа зегьы аалырԥшит", — ҳәа азгәалҭеит Кемулариа.
Ацәыргақәҵа иаҭааз Асиа Саносиан илҳәеит, апроект афырхацәа рфотосахьақәа дара рҭоурыхқәа рдырра угәадырԥхоит ҳәа.
Аиҿкааҩцәа иара убасгьы азал аҟны игылаз астол еиҵых дырҭәит Аԥсны инхо амилаҭқәа рыфатәхкқәа рыла. Изҭахыз дарбанызаалак урҭ ргьама ибар илшон.
Аестонжәлар ирызкыз афильм иаҳнардырит Аԥсны ишынхоз 300 ҭаацәара. Иахьа урҭ 300-ҩык роуп иҟоу. Дара ирҳәеит иуадаҩыз аибашьра ашьҭахьтәи аамҭақәа рзы ԥсадгьылны иршьо Аԥсны ааныжьра шырҭахымхаз.
Мильва Каарес дшестонҭыԥҳаугьы аԥсышәала алакәқәа лыҩуеит, Аԥсны лыԥсадгьылны илшьоит.
Апроект "Культурное многообразие – богатство общества" аҳәаақәа ирҭагӡаны ахәаԥшцәа идырбан ателефильмқәа жәба.
