АҞӘА, ԥхынгәы 18 – Sputnik, Бадраҟ Аҩӡба. Арасааӡараз Аԥсны адунеи аҟны афбатәи аҭыԥ ааннакылоит, иҳәеит арадио Sputnik аинтервиу азҭаз икоммерциатәым аилахәыра "Крепкий орешек" ахада Абессалом Кәарҷиа. Актәи аҭыԥ ааннакылоит Ҭырқәтәыла, нас – Италиа, Америка, Азербаиџьан, Қырҭтәыла, Аԥсны.
Абессалома Кәарҷиа иажәақәа рыла, Аԥсны арасеиҭаҳараз рхы иадырхәо аметодқәа ишьақәыргыло анормақәа ирықәшәом.
"Ииашаны иахьеиҭаҳау, ҳара 5-6 кьыла араса ахьҳауа 15-20 кьыла рҟынӡа уоур ауеит. Ҳара еизааигәаны еиҭаҳҳауеит, адунеи зегьы аҟны 5-6 метра рыбжьарҵоит, еиҭарҳауагьы шьаҭак ауп. Уи аҽаҩра еиҳа иахәоит", — иҳәоит Кәарҷиа.
Абессалом Кәарҷиа иажәақәа рыла, Аԥсны арасааӡара рнапы алакуп жә-нызқь рҟынӡа ҭаацәара.
"Иҟоуп 20 тонна аазрыхуа, иҟоуп 3-тоннак, 2-тоннак ма еиҵаны иаазрыхуа, аха иааидкыланы жә-нызқь ҭаацәара абри аус иаҿуп", — иҳәоит иара.
5 миллионк рҟынӡа расашьапы аҽаҩра аарышьҭуеит ҳәа азгәеиҭоит Кәарҷиа. Адунеи аҟны уаанӡа араса ахьырмааӡозгьы аиҭаҳара иалагеит, иаҳҳәап Европа, Ҟрым.
