АҞӘА, ԥхынгәы 18 — Sputnik. Аҧсны Ахада Рауль Ҳаџьымба инапы аҵаиҩит Ҭырқәтәылатәи Ареспубликаҟны Аҧсны Аҳәынҭқарра Ахаҭарнак иаҭаразы Аусҧҟа.
Ҭырқәтәылатәи Ареспубликаҟны Аҧсны Аҳәынҭқарра Ахаҭарнакс дҟаҵоуп Ҳаразиа Вадим Николаи-иԥа. Уаанӡа Ҭырқәтәылатәи ареспубликаҟны Аҧсны Аҳәынҭқарра Ахаҭарнакс дыҟан Гыцба Инар Альберт-иԥа.
Аусԥҟаҟны хаҭала иарбоуп:
"Гыцба Инар Альберт-иԥа ихы дақәиҭтәызааит Ҭырқәтәылатәи Ареспубликаҟны Аҧсны Аҳәынҭқарра Ахаҭарнакс иҟазаараҟынтә. Ҭырқәтәылатәи Ареспубликаҟны Аҧсны Аҳәынҭқарра Ахаҭарнакс дҟаҵазааит Ҳаразиа Вадим Николаи-иԥа", — ҳәа.
Вадим Ҳаразиа Аԥсадгьыл ахь ахынҳәразы Аилак аиҳабыс дҟаҵан 2015 шықәса мшаԥымза 11 рзы. Уаанӡа ари аусҳәарҭа напхгара аиҭон Џьопуа Хьрыԥс Радион-иԥа.
