АҞӘА, ԥхынгәы 20 – Sputnik, Амра Амҷԥҳа. Аԥсны Агәыҳалалра Ацҳаражәҳәаҩ Едгар Ӷәазаа ИАР атәылақәеи, Аԥснsи, Аахыҵ Уаԥстәылеи рдипломатцәа ҿарацәа рсаммит аҳәаақәа ирҭагӡаны азҵаарақәа ииҭеит Урыстәыла Адәныҟатәи аусқәа рминистр Сергеи Лавров. Абри атәы Sputnik акорресподент изеиҭеиҳәеит иара, Едгар Ӷәазаа.
"Иазгәасҭар сҭахуп Аԥснытәи адипломатцәа ҿарацәа активла рхы шаадырԥшуаз. Ҳара иҳалшеит егьырҭ раасҭа азҵаарақәа аминистр изынашьҭра", ҳәа еиҭеиҳәоит Едгар Ӷәазаа.
Иара иазгәеиҭеит хаҭала Сергеи Лавров иацәажәараз алшара шиоуз.
"Аофициалтә еиԥылара ашьҭахь Сергеи Виктор-иԥеи сареи ҳаиҿцәажәеит. Сара исҭеит еиуеиԥшымыз азҵаарақәа – аинформациатә шәарҭадара, аекономикатәи, аполитикатәи асоциалтә зҵаарақәа рыӡбраҿы ауаажәларра ринтеграциа уҳәа ирызкны. Аминистр сызҵаарақәа зегьы иныҭкааны аҭак риҭеит. Сергеи Лаврови сареи хаҭала ҳаицәажәаразы ҭабуп ҳәа иасҳәар сҭахуп Инал Арӡынба", — иҳәеит Едгар Ӷәазаа.
Ҩымш имҩаԥысуа афорум иатема хаданы иҟоуп "Ҳаамҭазтәи адипломатиаҿы аинформациатә технологиақәа". Абри атәы аанацҳауеит РИА Новости.
Сергеи Лавров иазгәеиҭеит афорум аҳәаақәа ирҭагӡаны аилацәажәарақәа аилибакаара ишацхраауа, дасу идәныҟаполитикатә хырхарҭа аилкаара ишахәо.
"Афорум аҳәаақәа ирҭагӡаны иит аидеиа – адипломатцәа ҿарацәа жәларбжьаратәи рассоциациа аԥҵаразы. Сгәы иаанагоит аидеиа даара ишьахәуп ҳәа. Уи аиҿкаара ҳхахьы иаагоит" — иҳәеит Лавров.
Адипломатцәа ҿарацәа аԥшьбатәи Рфорум иалахәуп Аԥсны, Ермантәыла, Белоруссииа, Киргизиа, Таџьикисҭан, Узбекисҭан, Аахыҵ Уаԥстәыла рхаҭарнакцәа.
