АҞӘА, ԥхынгәы 27 – Sputnik. Аинцидентқәа раԥырҟәҟәаарази хырыҩ рыҭарази Амеханизм алахәылацәа 48-тәи аиԥылара мҩаԥыргеит ԥхынгәы 26 рзы Гал ақалақь аҟны.
Аинцидентқәа раԥырҟәҟәаарази хырыҩ рыҭарази Амеханизм амшхәаԥштә азҵаараҟны иқәыргылан аҳәынҭқарратә ҳәааҟны еиуеиԥшым ахҭысқәа рызҵаара. Абри атәы аанацҳауеит Аԥсны Адәныҟатәи аусқәа рминистрра аофициалтә саит.
Аинцидентқәа раԥырҟәҟәаареи хырыҩ рыҭареи рзы Амеханизм аҳәаақәа ирҭагӡаны имҩаԥысыз аиԥылара иалахәын: Аԥсны Ашәарҭадаратә маҵзура ахантәаҩы ихаҭыԥуаҩ Владимир Арлан, Аԥсны Ашәарҭадаратә маҵзура Галтәи араионтә ҟәша аиҳабы Ҭемыр Шергелиа, Аԥсны Ашәарҭадаратә маҵзура ацентртә аппарат аҟәша аиҳабы ихаҭыԥуаҩ Асҭамыр Колбаиа, Адәныҟатәи аусқәа рминистр ицхырааҩ Гьаргь Думаа.
Аганқәа изаамҭанытәиу аилатәара цәыббра 19 2017 шықәса рзы имҩаԥыргарц еиқәышаҳаҭхеит.
