Нхыҵ Кавказтәи абаикерцәа Аҟәаҟа иаауеит амотофестиваль рҽаладырхәырц азы

© Sputnik / Владимир Астапкович / Амедиаҵәахырҭахь аиасраНхыҵ Кавказтәи абаикерцәа Аҟәаҟа иаауеит амотофестиваль рҽаладырхәырц азы
Нхыҵ Кавказтәи абаикерцәа Аҟәаҟа иаауеит амотофестиваль рҽаладырхәырц азы - Sputnik Аҧсны
Анапаҵаҩра
НовостиTelegram
Жәларбжьаратәи амотофестиваль "Абхазский берег 2017" Аҟәа, Ареспубликатә стадион аҟны имҩаԥысраны иҟоуп ԥхынгәы 28-29 рзы.

АҞӘА, ԥхынгәы 27 – Sputnik, Амра Амҷԥҳа. Амотофестиваль "Абхазский берег 2017" уаанӡатәиқәа излареиԥшымхо, иара иалахәхоит Нхыҵ Кавказтәи абаикерцәа, ҳәа ҳзеиҭеиҳәеит амотоклуб "М8" ахада Александр Корноухов.

"Сынтәа амотоеилазаара иацлеит Чечниатәи аклуб "Абнатә дивизиа". Ара еизоит Нхыҵ Кавказ иаҵанакуа аклубқәа зегьы. Убри инадҳәаланы иҳаӡбеит арахь иааҳаԥхьарц Нхыҵ Кавказынтәи ашәаҳәаҩцәагьы. Москвантәи 2-3 гәыԥ ҟалоит. Арок алегендақәа ҳәа изышьҭо Артур Беркути Валери Скородеди хымԥада ҳарзыԥшуп", — иҳәоит Корноухов.

Корноухов иажәақәа рыла Урыстәыла зегьы аҟны Амотоклуб "М8" заҵәык ауп аҳәаанырцә афестивальқәа мҩаԥызго.

"Зегь хацыркхеит 17 шықәса раԥхьа Аԥсныҟа саарала. Аԥсны убриаҟара бзиа избеит, исҭахуп исылшо бзиарак азызуыр", — иҳәоит иара.

Аиҿкааҩцәа ақәгәыӷуеит амотофестиваль аҭааҩцәа рацәахап ҳәа.

Ателеканал "Неформат" акреативтә директор Наталиа Булдакова лажәақәа рыла есышықәса афестиваль рҽаладырхәуеит Уралтәи амотоциклистцәа. Сынтәа иара иалахәхоит Нхыҵ Кавказтәи амотоциклистцәагьы. Лара иазгәалҭеит, афестиваль аиҿкаара хықәкны иамоу амотоциклистцәеи амотоциклқәа бзиа избои реинырра арҭбаара шакәу.

Афестиваль аҟны имҩаԥгахоит амотобол азы амотоклубқәа реиндаҭлара, абокс азы аиндаҭлара, аканат аимырххара.

"Имҩаԥгахоит еиуеиԥшым ауснагӡатәқәа – ахәаԥшыҩцәа ргәы змырҿыӷьуа. Ирацәахоит амузыка. Афестиваль асасцәа рҿаԥхьа иқәгылараны иҟоуп Урыстәылатәи асцена ашәаҳәаҩцәа Артур Беркути Валери Скородеди, иара убасгьы Кавказ еиуеиԥшым арегионқәа рҟынтәи амузыкатә коллективқәа", — лҳәоит лара.

Наталиа Булдакова иазгәалҭеит афестиваль аԥсуа мотоциклистцәагьы шалахәхо.

"Аԥсынгьы иҟоуп амотоцикл абзиабаҩцәа. Иакымкәа иҩбамкәа измоу. 2012 шықәса раахыс дара афестиваль иацеиҿкааҩцәоуп. Ирацәоуп урҭ рылшарала аҭыԥ аҿы иҳаӡбо азҵаарақәа" — лҳәоит Булдакова.

Жәларбжьаратәи амотофестиваль "Абхазский берег 2017" Аҟәа, Ареспубликатә стадион аҟны имҩаԥысраны иҟоуп ԥхынгәы 28-29 рзы.

Амотофестиваль информациатә партниорны иҟоуп аинформациатә маҵзуреи арадиои Sputnik Аԥсны.

Ажәабжьқәа зегьы
0