АҞӘА, ԥхынгәы 28 – Sputnik, Роберт Џьопуа. Гепатит, ВИЧ-инфекциа, асифилис рымазааразы ашьагәаҭара мҩаԥнагоит СПИД иаҿагыланы ақәԥаразы Ацентр. Абри атәы лҳәеит Sputnik аҿы имҩаԥысуаз апресс-конференциаҟны ацентр алабораториа аиҳабы лнапынҵақәа назыгӡо Саида Палԥҳа. Лара иазгәалҭеит аҵыхәтәантәи аамҭазы Аԥсны агепатит зыхьуа рхыԥхьаӡара еиҵахо иалагеит ҳәа.
"Есышықәса ҳцентр аҟны игәаҳҭоит 6 инаркны 8 нызқьҩык рҟынӡа ауаа. Гепатит В ааҳарԥшуеит 300-350-ҩык рҟны, гепатит С рыдаабалоит 400-450-ҩык. Аҵыхәтәантәи аамҭазы гепатит зыхьуа рхыԥхьаӡара 12 процент аҟынтәи 5 процентк аҟынӡа илаҟәит" — лҳәоит Палԥҳа.
Лара лажәақәа рыла 2004 шықәса раахыс Ацентр аҿы аҽгәаҭара мҩаԥыргахьеит 70 000-ҩык рҟынӡа ауааԥсыра.
Ареспубликатә хәышәтәырҭа атерапиа аҟәша аиҳабы Анжела Арҷелиаԥҳа ажурналистцәа ирзеиҭалҳәеит аиҳарак иуԥыло агепатит В,С, D роуп, иналаршә-ааларшәны иуԥылоит агепатита G, TTV ҳәа.
Аҳақьымцәа ирҳәеит авакцина ззыҟарҵо агепатит ахкқәагьы ыҟоуп ҳәа. Уахь иаҵанакуам агепатит С.
