АҞӘА, ԥхынгәы 31 — Sputnik. Ателеканал RT астрингер Халид аль-Хатыб шьамтәылатәи апровинциа Хомс ИГИЛ аибашьцәа аналахысуаз иоуз ахәрақәа ирыхҟьаны иԥсҭазаара далҵит. Абри атәы аанацҳауеит РИА Новости ателеканал RT асаит адыррақәа шьаҭас иҟаҵаны.
"Ателеканал RT адырра ҟанаҵоит акорреспондент Халида аль-Хатыба, шьамтәылатәи ар имҩаԥырго аоперациа аҭыхраан дыршьит апровинциа Хомс аҩадатәи ахәҭаҿы", ҳәа аанацҳауеит ателеканал асаит аверсиа. Ателеканал адыррақәа рыла ажурналист ахәрақәа иоуит ИГИЛ аибашьцәа абри араион ианалахысуаз.
Аль-Хатыб 22 шықәса ихыҵуан. Иара Дамасктәи ауниверситет аҟны аҵара иҵон.
