АҞӘА, нанҳәа 11 – Sputnik, Амра Амҷԥҳа. 37-ҩык ашахматистцәа аиааира ргеит 6 инаркны 73 шықәса зхыҵуаз 102-ҩык ашахматистцәа злахәыз атурнир "Сухум OPEN —2017" аҟны.
Актәи аҭыԥ ааникылеит Ермантәылатәи ашахматист қәыԥш Левон Карапетиан. Иара ԥшьышықәсоуп ашахмат асра инапы алакуижьҭеи.
"Иара ахәмаррақәа жәба рҟны жәынтә аиааира игеит. Лассы-лассы ашахматтә хәмаррақәа ихы рылаирхәуеит. Сынтәа Аԥсныҟа даазгеит. Аҭыԥантәи иқәлацәа драбадырит. Еиҩызцәахеит", ҳәа еиҭеиҳәоит Левон иабду Лиова Карапетиан.
Атурнир аҿы иаиааизи иалахәуи рахь адныҳәаларатә жәа иҳәеит ашахмат азы изныкымкәа адунеи аиачемпионхахьоу Александра Костениук лаб, лазыҟаҵаҩ, Афон Ҿыц инхо Константин Костениук.
"Аҵахара ухаршҭны, улаӷырӡқәа аарыцқьаны аиааирақәа урызхәыцуа ԥхьаҟа уҿыноухароуп, ухықәкы уазнеироуп. Убасҟан ауп аиааирақәагьы уара уахь рҿы анхьадырҳәуа. Ақәҿиарақәа шәаҭәашьаз", — иҳәеит иара.
Аԥсуа шахматист Нестор Кәыҵниа маҷк ауп аиааираз игхаз, аха уи сара сзы иԥышәоуп ҳәа ишьоит иара.
"Даара бзиа ибаны ашахмат сасуеит. Ашкол аҟны сҵараҿы исыцхраауеит. Аиааира ануго агәырӷьара ду уатәнатәуеит. Уанаҵахо – аԥышәа уоуеит", — иҳәоит 10 шықәса зхыҵуа Нестор.
Атурнир алахәылацәа рҟынтә зегьы иреиҵбын 6-6 шықәса зхыҵуаз Еснат Чуаз, Софиа Кәарҷиаԥҳа, Сабри Нанба.
"Ихәыҷқәоуп ҳәа шәырмыхәаԥшын. Ашахмат дара рхала иалырхит, изныкымкәагьы аицлабрақәа ирылахәхахьеит", ҳәа рҳәоит Сабри иан Иулиа Поповеи Софиеи Еснаҭи ранду Ангелина Кәарҷиаԥҳаи.
Дениел Полеи адгылара илҭарц атурнир ахь иааиит иара иан Еленеи иаҳәшьа Анаидеи.
Дениел агәахәара ду иманы иани иаҳәшьеи ианашьахаз амедали аҳаҭыртә шәҟәи дирбоит, иагьиҳәоит ҽаангьы хымԥада атурнир иҽшалаирхәуа.
"Атурнир "Сухум OPEN —2017" хыркәшахеит. Атурнир ахь иааиит ирацәаҩны асасцәа. Алахәылацәа зегьы амедалқәеи аҳаҭыртә шәҟәқәеи ранашьоуп, аиааира згаз Ахраҿақәа ранашьоуп. Ҽаангьы ҳашәзыԥшуп", — иҳәеит еизаз раԥхьа дықәгыло ашахмат азы Аԥсны Афедерациа аиҳабы Константин Ҭыжәба.
XIV Жәларбжьаратәи ашахматтә фестиваль "Абхазия OPEN —2017" мҩаԥысуан: Гәдоуҭа, Аҟәа, Гагра, Очамчыра.
