АҞӘА, нанҳәа 16 – Sputnik, Бадраҟ Аҩӡба. Ҟабарда-Балкариатәи Академиатә ансамбль "Кабардинкеи" Аԥсны жәлар рыкәашара Аҳәынҭқарратә ансамбль "Кавкази" Аҟәа еицықәгылеит нанҳәа 15, зхатәгәаԥхарала еибашьуаз рымш азгәаҭараан.
Аколлективқәа инарыгӡеит амилаҭқәа рыҩба рыкәашарақәа. Ахәаԥшцәа гәацԥыҳәарыла, напеинҟьарыла ирыдыркылеит еицырдыруа аколлективқәа рықәгылара.
Ахәаԥшыҩцәа хнахит Азамаҭ Алакаев аҟамақәа кны икәашареи, адауласыҩцәа рыхәмарреи.
Еизаз рҿаԥхьа дықәгылеит Аԥсны Ахада ихаҭыԥуаҩ Витали Габниа. Иара иналкааны иазгәеиҭеит Аԥсны жәлар Рџьынџьтәылатә еибашьраан хатәгәаԥхарала зыҩнқәа, зҭаацәа, зҭынч ԥсҭазаара ааныжьны цхыраара иаҳзааз ауаа рлагала ду атәы.
"Иахьатәи арыцхә аиԥш зеиԥшу ҳҭоурых иаздырам. Иацы изгәаҳҭон аибашьра алагара раԥхьатәи амш. 25 шықәса раԥхьа еиқәных иҟаз Қырҭтәыла ар Аԥсны иалалеит рнапахьы иааргарц. Уи алыдмыршеит акаҵәарақәеи ашьхахыҵырҭақәеи ирхысны иааины иааҳавагылаз ҳашьцәа" — иҳәеит иара.
Аӷа имчқәа рыхә изымшьеит, аԥсуаа сыриааиуеит ҳәа агәрагара иман иҳәеит Ахада ихаҭыԥуаҩ.
"Ҳаӷацәа ԥсадгьылк ада аҽа ԥсадгьылк шҳамамыз, уи азы ҳшықәԥоз, ҳашьцәа адыгаа, абазақәа, аҟарачқәа, абалкарцәа, ауаԥсқәа, ачеченеццәа уҳәа ацхыраара шҳарҭоз агәра рызгомызт" — иҳәеит иара.
1992-1993 шықәсазтәи Аџьынџьтәылатә еибашьра иалахәын 2 000-ҩык инареиҳаны хатәгәаԥхарала еибашьуаз. Урҭ рҟынтәи 51-ҩык Аԥсны Афырхаҵа ҳәа ахьӡ иаԥсоуп, 247-ҩык Леон иорден ранашьоуп, 623-ҩык "Агәымшәараз" амедал ранашьоуп. Аибашьра цонаҵы иҭахеит 260-ҩык аибашьцәа.
