АҞӘА, нанҳәа 16– Sputnik. Хә-сааҭк инарзынаԥшуа "Ҭҟәарчал ГРЕС" афымцалашара аанкылара мҩаԥгахоит аԥшьашаҽны, нанҳәа 17 рзы иазыԥхьагәаҭоу аремонт-профилактикатә усурақәа рымҩаԥгаразы. Арантәи афымцалашара зауа ауаагьы абри аамҭазы фымцалашарада иаанхоит. Абри атәы аанацҳауеит АУН "Амшынеиқәафымцамч" асаит.
АУН "Амшынеиқәафымцамч" апресс-маҵзура аиҳабы Саид Барганџьиа ишиҳәаз ала фымцалашарада иаанхоит Ҭҟәарчали Очамчыреи араионқәа руааԥсыра.
"Ҭҟәарчал ГРЕС" аанкылара уаанӡа иазыԥхьагәаҭоу уснагӡатәуп. Ара аремонт-профилактикатә усурақәа мҩаԥгалатәуп. Нанҳәа 17 асааҭ 11:00 инаркны 16:00 сааҭ рҟынӡа астанциаҟәша аусура аанкылахоит. Асеиԥш иҟоу аамҭа-аамҭалатәи афымцамч аанкылара мҩаԥысуеит егьырҭ астанциаҟәшақәа рҟынгьы" — иҳәоит Саид Барганџьиа.
Иара убри аан иазгәеиҭеит алаҳәара шыҟаҵоу инақәыршәаны асааҭ 16:00 рзы иарбоу араионқәа рҟны афымцалашара шрыҭахо.
