АҞӘА, нанҳәа 17 — Sputnik. Урыстәылатәи Афедерациа Иреиҳаӡоу аӡбарҭа уаанӡа ииашоуп ҳәа азханаҵахьан "Урыстәыла Иегова ишаҳаҭцәа рнапхгаратә центр" аԥыхра. Иара аусура екстремист усуроуп ҳәа ишьоуп. Аӡбамҭа азакәан шьаҭа аиуит. Урыстәылатәи Афедерациа Аиустициа аминистрра "Иегова ишаҳаҭцәа" аекстремизм азы иаԥыху аиҿкаарақәа реиқәыԥхьаӡа иацнаҵеит. Абри атәы аанацҳауеит РИА Новости.
Абри аиқәыԥхьаӡахь иаҵаркуп "Урыстәыла Иегова ишаҳаҭцәа рнапхгаратә центр" аиԥш иара аилазаара иалаз 395 еиҿкаара.
Аиустициа аминистрра агәаанагарала "Ашаҳаҭцәа" русура ауаажәларра ринтересқәеи рзинқәеи еиланагоит, ауаажәларратә шәарҭадара иаԥырхагоуп.
"Иегова ишаҳаҭцәа" азиндырыҩцәа арҭ зегьы иашам ҳәа иазырыԥхьаӡоит.
"Урыстәыла Иегова ишаҳаҭцәа рнапхгаратә центр" Урыстәыла "Иегова ишаҳаҭцәа" афилиалқәа напхгара рызҭо еиҿкаара хадоуп.
Урыстәыла "Иегова ишаҳаҭцәа" еиднакылоит 175 000-ҩык ауааԥсыра.
