АҞӘА, нанҳәа 18— Sputnik. Испаниа, Барселона ақалақь аҟны ауаа ахьынеиааиуаз аҭыԥ аҿы автомашьына ауаа рыжәпара иалалеит.аполициаа рыԥшаара иаҿуп атеракт ҟазҵаз ҳәа агәаанагара зызрымоу ҩыџьа ауаа. Абри атәы аанацҳауеит РИА Новости.
Азинхьчаратә органқәа ишьақәдырӷәӷәоит аԥсыҭбарақәа шыҟоу, ааха зауз ауаа ахәышәтәырҭақәа рахь ишнагоу.
Агазеҭ El Pais, ашаҳаҭцәа ражәақәа рыла иакьыԥхьит автомашьына ауаа ахьныҟәоу амҩаду аганахь иқәланы ауаа рыжәпара ишалалаз. Арыцҳара ахьыҟалаз аҟынтәи амашьына аԥсҟы зкыз дыбналеит. Иара уажәы иԥшаара иаҿуп.
Ахҭыс ахьыҟалаз араион иаарласны аполициаа иҭахыркааит, ааигәа-сигәа иҟоу адәқьанқәа, асасааирҭақәа, акрыфарачарҭақәа рышәқәа адыркит. Арахь иааиит ацхыраара ласы автомашьынақәа.
Испаниа Аԥыза-министр Мариано Рахои аҳәамҭа ҟаиҵеит ақалақь ахадареи иареи аинырра шрымоу. Уажәазы еиҳа аҵакы зманы иҟоу ахәцәа ацхыраара рыҭареи ашәарҭадара аиҿкаареи роуп ҳәа.
