АҞӘА, нанҳәа 21– Sputnik, Бадраҟ Аҩӡба. Урыстәыла Ахраҿа Mitjet 2L ахәбатәи аетап ала далкаахеит атурнир аҟны аиааира згаз ҳәа Sputnik акорреспондент изеиҭеиҳәеит Дмитри Ӷәазаа.
"Урыстәыла Ахраҿаҿ иаиааиз заанаҵы деилкаахеит. Уи Иван Лукашевич иоуп. Сара аҩбатәи аҭыԥ азы сықәԥалоит", — иҳәеит Дмитри Ӷәазаа.
Урыстәыла Ахраҿа Mitjet 2L ахәбатәи аетап аҟны аиааира игеит Дмитри Ӷәазаа. Аиндаҭлара мҩаԥысуан Казань, нанҳәа 19 рзы. Афиналтә, афбатәи аетап мҩаԥысраны иҟоуп цәыббра 15-16 рзы.
Аспортсмен иаҳзеиҭеиҳәеит Казантәи автодром дшашьцылаз атәы.
"Атрасса сашьцылеит. Актәи аиндаҭлараан Алексеи Карачеви сареи ҳаиҟараны ҳаицнеиуан, аха аҵыхәтәантәи аикәшараан агха ҟасҵеит, аҩбатәи сакәхеит", — иҳәоит иара.
Дмитри Ӷәазаа Ахраҿаз аԥшьбатәи аетап аиндаҭларақәа ҩба рҟны призиорс дыҟан, уи инаҭеит алшара аҵыхәтәантәи аиндаҭлараан актәи аҭыԥ аҟынтәи аҵҟьараз.
"Уажәы зегьы шысҭахыз еиԥш ишьақәгылеит. Схы сақәгәыӷуа сыҵҟьеит. Маҷ-маҷ зегьы сраԥыҟьеит, актәи сакәынгьы афиниш ахь снеиит", — ҳәа еиҭеиҳәоит аспортсмен.
Урыстәыла Ахраҿа Mitjet 2L – 2017 афбатәи аетап финалтәхоит, Шәачатәи автодром аҟны имҩаԥгахоит.
Асериа Mitjet 2L акыр ирылаҵәаны иҟоуп Франциа, Италиа, Германиа, Урыстәыла, США. Асериа Mitjet шьаҭаиркит еицырдыруа афранцыз спортсмен Жан-Филипп Даиро. Акласс MITJET 2L – иаҵанакуа автомашьынақәа зегьы 750 кьыла иҟоуп, абылтә бак 37 литра акуеит.
