АҞӘА, нанҳәа 22– Sputnik, Сариа Кәарацхьелиаԥҳа. Агәыҳалалратә акциа "Иныҳәамшу цәыббра акы" мҩаԥысуеит аҵарашықәс ҿыц иалагаанӡа ҳәа Sputnik иазеиҭалҳәеит Агәыҳалалратә уаажәларратә еиҿкаара "Кьараз" анагӡаратә директор Камма Гоԥиаԥҳа.
"Ҳара агәҭынчымра ҳанаҭоит хылаԥшра заҳҭо ахәыҷқәа ашкол ахь рыҽшеибырҭо. Ииасыз ашықәс азы ҳауаажәлар рыцхыраарала 300-ҩык ахәыҷқәа ашкол иазҳархиеит: еиқәҳаршәеит маҭәалеи аканцелиариатә тауарқәеи рыла", — ҳәа еиҭалҳәоит Гоԥиаԥҳа.
2016 шықәса рзы агәыҳалалратә еиҿкаара 100 000 мааҭ зылшара ԥку ахәыҷқәа ашкол ахь реиқәыршәаразы иннахит. Сынтәа еиҳагьы еиҳаны аԥара аҭахуп, избанзар ахәыҷқәа рхыԥхьаӡара еиҳа еиҳауп.
"Аԥсны араионқәа зегьы рҟны аусура ҳахьалагаз инамаданы ахәыҷқәа рхыԥхьаӡарагьы еиҳахеит. Ҳәарада ҳара ҳауаажәлар, ҳбизнесуаа, ҳнаплакыҩцәа рҟынтәи ацхыраара ҳазыԥшуп", — лҳәеит лара.
Иара убасгьы ашколқәа рҟны еиҿкаахоит "Агәыҳалалра акәакьҭа".
