АҞӘА, нанҳәа 23 – Sputnik, Бадраҟ Аҩӡба. Атәанчахәы аноуҳажьуа раԥхьатәи амш азы Аԥсны инхо атәанчаҩцәа зегьы аԥара рызшара акыр иуадаҩуп иҳәеит Аԥсны Амилаҭтә банк ахантәаҩы Беслан Бараҭелиа АРСМИРА имҩаԥигаз апресс-конференциаҟны.
"Аԥснытәи атәанчаҩцәа ртәанчахәы 400 миллион мааҭ ыҟоуп. Шьыжьы инаркны хәлаанӡа абонкоматқәа ирҿухуазаргьы ԥшьбаҟа мшы уадхалоит. Уи адагьы аԥышәа иаҳнарбеит аԥхьатәи хԥа-ԥшьба мшы роуп агәаранқәа аныҟало, нас аҭагылазаашьа ҭышәынтәалоит. Иануҭаху унеины аԥара амухыртә иҟалоит уадаҩрада", — иҳәеит иара.
Есымза, арыцхә 18 рзы атәанчаҩцәа рԥарақәа, 400 миллион мааҭ, аамҭак ала атәанчаҩцәа ркарточкақәа рахь ииагахоит иҳәеит абанк адиректор.
"Амза 18, асааҭ 11 инаркны дарбанызаалак атәанчаҩы итәанчахәы иоур илшоит", — ҳәа азгәеиҭеит Бараҭелиа.
Иара убри аан аиҳараҩык ирҭахуп ртәанчахәы аԥхьатәи амш азы иргар. Уи ауп иҟалало агәаранқәагьы зыхҟьо.
"Есмза, арыцхә 18 рзы абанкоматқәа рааигәара узнеиуам. Абри амш аҽны 60-80 миллион рҟынӡа аԥара ҭыргоит. Ус иҟоуп адырҩаҽны, адырхаҽны. Нас аҭагылазаашьа ҭынчхоит", — иҳәеит иара.
Абанкқәа ртерминалқәа рхыԥхьаӡара шмаҷу, урҭ ишырзырҳатәу дақәшаҳаҭхо Бараҭелиа иҳәоит:
"Амза 18 рзы шәкыла абанкоматқәа ирҭаҳҵап урҭ 400 миллион аԥара. Ироуп мышкала ауаа ртәанчахәы, аха амза егьырҭ амшқәа зегьы абанкоматқәа усда игылазар аума? Ари иаанаго аԥара баша ахарџьроуп", — ҳәа.
Ауадаҩрақәа шырацәоугьы аус шьаҿа-шьаҿа аиҭаҵра иаҿуп ҳәа азгәеиҭоит Бараҭелиа.
"Уаанӡа 80% ауаа ртәанчахәы зегьы мышкала иҭыргозар, уажәы еихыршо иалагеит. Уи адагьы шәарак аҳасабала акарточка зхы иазырхәо рхыԥхьаӡарагьы иацлеит", — иҳәеит иара.
Беслан Бараҭелиа иажәақәа рыла аӡын, ааԥын амзақәа раан ауаа еиҳа активла ртәанчахәқәа ргоит. Аԥхынразы, аҽа хныҟәгашьатә хыҵхырҭақәак аныҟоу атәанчахәы агарагьы рацәак иахыццакуам.
