АҞӘА, цәыббра 8 — Sputnik. Рауль Ҳаџьымба Ҟабарда-Балкариатәи Ареспублика Ахада Иури Коков иааҧхьарала визит ҳасабла Ҟабарда-Балкариатәи Ареспубликаҟны дыҟоуп. Аҳәынҭқарра амши Ҟабарда-Балкариеи Урыстәылеи рыжәларқәа ракра 460 шықәса ахыҵреи разгәаҭара иазку аныҳәатә усмҩаҧгатәқәа дрылахәуп ҳәа аалыцҳауеит атәыла Ахада ипресс-маӡаныҟәгарҭа.
"Сара ара шәбара сеигәырҕьоит. Ҳажәларқәа ирыбжьоу аиҩызаратә еизыҟазаашьақәа шьақәырҕәҕәахеит Аҧсны ахьчаразы игылаз, аҧсуа жәлар ирыдгылаз Ҟабарда-Балкариантәи хатәгәаҧхарала инеиз аибашьцәа рыла. Ҳара ҳаизыҟазаашьақәа аҧхьаҟагьы инагӡахароуп", — иҳәеит Рауль Ҳаџьымба Ҟабарда-Балкариатәи Ареспублика Ахада Иури Кокови иареи реиԥылараан.
Иури Коков Рауль Ҳаџьымба Ареспублика дахьаҭаази иҟаиҵо адгылареи рзы иҭабуп ҳәа иеиҳәеит.
"Ҳажәларқәа ирыбжьоу аизыҟазаашьақәеи рзеиҧш ҭоурыхи ҳасаб рзуны даҽакала ҟалашьа амаӡамызт", — иазгәеиҭеит Иури Коков.
Аҧсны Аҳәынҭқарра Ахада иазгәеиҭеит 1992-1993 шықәсқәа рзы Аҧсны Жәлар рџьынџьтәылатә еибашьраан Аҧсны ахақәиҭтәразы ақәҧараан Ҟабарда-Балкариатәи хатәгәаҧхарала еибашьра иааз рроль.
Аҧсны Аҳәынҭқарра Ахада Рауль Ҳаџьымбеи Ҟабарда-Балкариатәи Ареспублика Ахада Иури Кокови иазгәарҭеит жәытәнатә аахыс Аҧсни Ҟабарда-Балкариеи ирыбжьоу акультуратәи адоуҳатә еимадарақәеи, ирылацәажәеит аҧхьаҟатәи ҩ-ганктәи русеицура иадҳәалоу азҵаарақәа.
Аԥсны Ахада иусутә визит мҩаԥысуеит 2017 шықәса цәыббра 7 инаркны цәыббра 9 рҟынӡа.
