1993 шықәса цәыббра 27 рзы иалагеит аҳҭнықалақь ахақәиҭтәразы ажәылара. Ажәылара иалахәын иакымкәа агәыԥқәа. Ареспубликатә стадиони аџьармыкьа хадеи рганахьала иааиуан актәи абригада аибашьцәа, Аҳәынҭқарратә прокуратура ахыбра аганахьала Аиҳабыра рыҩнахьы рхы рханы инеиуан ҟабардатәи агәыԥи аерманцәа рбаталиони.
Аҩадантәи Аиҳабыра рыҩнахьы инеиуан аҩбатәи абригада аруаа. Иара убри аамҭазы уахь рхы хан актәии аҩбатәии абригадақәа. Асааҭ 13:30 рзы Аиҳабыра ҩны ахақәиҭтәразы аибашьра ӷәӷәа ҭарҵеит. Ҩ-сааҭк рыҩныҵҟала ахыбра ҭарцәын, Аԥсны абираҟ ахашәыршәыруа иахаргылан. Аҟәа ахақәиҭтәразы аоперациа иааидкыланы 11 мшы ицон.
Иара напхгара арҭон Атәылахьчара аминистр, аинрал-маиор Сулҭан Сосналиев, Аԥсны арбџьар мчқәа рштаб хада аиҳабы, аинрал-маиор Сергеи Дбар.
1993 шықәса цәыббра 27 рзы аԥсуа еибашьцәа аӷа иҿагылара ӷәӷәаӡа иаиааины Аҟәа ақалақь ахы иақәиҭыртәит.
