АҞӘА, цәыббра 28 — Sputnik. Шәача 60 километра инацәхыкны, Лазаревск араион аҟны ауааԥсыра адгьыл шҵысыз рнырит. Адгьылҵысра аепицентр ашьхақәа иргәылан. Абри атәы аанацҳауеит РИА Новости, Шәачатәи асеисмологиатә станциа аиҳабы Елена Карпович лажәақәа шьаҭас иҟаҵаны.
"Асааҭ 06:35 рзы х-баллк инаӡоз адгьыл аҵысра аҭыԥ аман. Ауаа аҭел иаҳзасуан. Аепицентр ашьхақәа рҟны акәын иахьыҟаз", — лҳәоит асеисмолог.
Ариаҟара балл иҟоу адгьылҵысрақәа Краснодартәи атәылаҿацә аҟны иџьоушьартә иҟам, лассы-лассы иҟалалоит лҳәеит Карпович.
Краснодартәи атәылаҿацә Аҭагылазаашьа ҷыдақәа апресс-маҵзура адыррақәа рыла ԥсыҭбара ҟамлеит, ахыбрақәагьы кьыс рымам.
