АҞӘА, жьҭаара 3 – Sputnik. Каталониагьы Аԥснеиԥш иамоуп ахатәы ҭоурых, акультура, ақабзқәа, аҵасқәа. Абри атәы азгәаҭан Аԥсны Адәныҟатәи аусқәа рминистрра иҟанаҵаз аҳәамҭаҟны.
"Каталониатәи ахҭысқәа Аԥснытәи ахҭысқәа акыр иреиԥшнушьалартә иҟоуп. Аԥсынгьы, иахьа Каталониа еиԥш ахьыԥшымраз иқәԥон, ишалшоз ала ҭынчмҩала. Уи аҭакс Қырҭтәыла абџьар шьҭыхны арахь икылсит", — ҳәа аҳәоит аҳәамҭаҟны.
Аԥсны Адәныҟатәи аусқәа рминистрра иара убасгьы гәалсрыла иазгәанаҭоит Испаниа иахьатәи анапхгара ахатәы тәылауаа рганахь ала ацәгьара шыруа.
"Испаниатәи амчрақәа ахантәгьы мап ацәыркуан ареферендум алкаақәа разхаҵара", — ҳәа аҳәоит аҳәамҭа.
Аԥсны Адәныҟаполитикатә усбарҭа азхьаԥшра анаҭоит ареферендум аламҭалаз испаниатәи анапхгара хыԥхьаӡара рацәала Каталониа еицырдыруа ауаажәларратәи аполитикатәи усзуҩцәа рҭакрақәа шымҩаԥыргоз.
"Угәы унамырхьыр залшом европатәи ацивилизациатә тәылақәа, адемократиа ҳақәныҟәоит ҳәа зхы зшьақәо иарбанызаалак аҽа гәаанагарак раҳарц ахьырҭахым. Урҭ амчра рхы иархәаны аԥыжәара ргарц рҭахуп. Агәра аагоит Испаниа аҭыԥ змоу аҩныҵҟа политикатә кризис азинтә мҩа иацәхымҟьакәа аӡбшьа аҭахап ҳәа", — азгәаҭоуп Аԥсны ААР аҳәамҭаҟны.
