АҞӘА, жьҭаара 6 – Sputnik, Бадраҟ Аҩӡба. Аԥсны Аекономика аминистрра аделегациа абизнес-форум "Атланты" иалахәуп. Абри атәы ҳзааицҳаит Аекономика аминистр Адгәыр Арӡынба.
"Х-нызқьҩык инареиҳаны анаплакыҩцәеи атоп-менеџьерцәеи злахәу абизнес-форум "Атланты" мҩаԥысуеит Москва жьҭаара 5-6 рзы. Абизнес-форум иалахәуп Урыстәыла абизнес еилазаара ахаҭарнакцәа, аиҳарак абизнес маҷи абжьаратә бизнеси рхаҭарнакцәа" ҳәа еиҭеиҳәеит аминистр.
Адгәыр Арӡынба иазгәеиҭеит ари афорум Аԥсны азы акыр аинтерес аҵоуп ҳәа.
"Араҟа анаплакыҩцәеи абизнесуааи рԥышәа еимырдоит, ирылацәажәоит еиуеиԥшым азҵаарақәа. Уажәы ҩынтәуп ари ауснагӡатә мҩаԥысуеижьҭеи. Ҳара ҵыԥхгьы ҳалахәын", — иҳәоит иара.
Аминистр иажәақәа рыла абизнес-форум аҟны иқәгылараны иҟоуп Урыстәылатәи Афедерациа Аекономика аҿиара аминистри егьырҭ аҳәынҭқарратә усзуҩцәеи.
Аԥснытәи аделегациа алахәылацәеи Урыстәылатәи анаплакыҩцәеи еиуеиԥшым аиныррақәа рыман.
"Ҳара Аԥсны ҳалацәажәон, иазгәаҳҭон ҳтәыла иамоу алшарақәа ртәы. Ирацәаҩуп ҳтәылахь аинтерес зызцәырҵуаз", — иҳәоит Арӡынба.
Урыстәыла зегь аҟынтәии адунеи атәылақәа 21 рҟынтәии х-нызқьҩык инареиҳаны анаплакыҩцәеи атоп-менеџьерцәеи злахәу абизнес-форум "Атланты" мҩаԥысуеит Москва жьҭаара 5-6 рзы. Афорум аҳәаақәа ирҭагӡаны иқәгылараны иҟоуп 67-ҩык ажәахәҟаҵаҩцәа, анаплакуаа рзы аинтерес змоу атемақәа рыла.
