АҞӘА, жьҭаара 10– Sputnik, Сариа Кәарацхьелиаԥҳа. Цәыббрамзеи жьҭаарамзеи ирылагӡаны идырым џьоукы жәаба инареиҳаны пальма амца рыцраҵаны ирыблит. Абри атәы Sputnik акорреспондент изеиҭеиҳәеит АҶА ахаҭарнак Ҭимур Кәыҵниа.
"Асеиԥш адыррақәа анҳаулак уахь ҳнеиуеит, ҳахьӡозар амца ҳарцәоит", — иҳәеит иара.
"Иацы ҩынтә аҭел иаҳзасит. Аԥхьа Сахаров имҩаҿ амца ҳарцәеит, нас – Амҳаџьыраа рыԥшаҳәаҿы. Иахьа шьыжьнаҵы еиҭах адырра ҳауит" ҳәа еиҭеиҳәоит Кәыҵниа.
"Апальмақәа амца дзыркуа макьаназ ишьақәыргылам. Ҳара уа ҳаннеиуа аӡәгьы ихабар аабом. Аҭел иасуа ааигәа-сигәа инхо ма амҩасцәа роуп. Апальма амца азыркыз ахаҿқәа еилкаамкәа инхоит", — ҳәа азгәеиҭоит иара.
АҶА аусзуҩ иҳәоит апальма амца ацраҵара ишнеи-шнеиуа иацразҵаз рзы еиҳау апроблемахь икылсыр ауеит. Уи адагьы аҵлақәа рааигәа игылоу ахыбрақәа рахь амца ииасыр алшоит.
Цәыббрамзеи жьҭаарамзеи рыҩныҵҟа амца ддыркит ааба инареиҳаны пальма ҵла.
Аџьармыкьаҿ зоура метрак иҩаӡоу апальма ахәԥса иартәоит 3500 мааҭ. Зықәра наӡахьоу апальмақәа роура 12-20 метра рҟынӡа инаӡоит.
