АҞӘА, жьҭаара 12— Sputnik. Жьҭаарамза 12 рзы Аҧсны Аҳәынҭқарра Ахада Рауль Ҳаџьымба Аҩныҵҟатәи аусқәа рминистрра аколлектив Аминистр ҿыц Гарри Аршба дыдирдырит ҳәа аанацҳауеит атәыла Ахада иофициалтә саит.
Аҳәынҭқарра Ахада иазгәеиҭеит Аҩныҵҟатәи аусқәа ҧасатәи рминистр иҟаиҵаз шмаҷым, аха ишырҕәҕәатәу аҳәынҭқарраҿы ацәгьоура иаҿагыланы ақәҧара.
"Аҧсны акриминогентә ҭагылазаашьа еиҳа ҕәҕәала анырра аҭатәуп. Шьҭа зынӡа даҽакала аусура аҭахуп. ААР аҟны ацәгьоурақәа рҿагыларазы аусура рҕәҕәатәуп. Аминистр ҿыц ари апроцесс ирццакуеит ҳәа сгәы иаанагоит. Шәара иара иахьадагьы дыжәбахьеит, дыжәдыруеит. Уи аоперативтә усура бзианы издыруа специалиступ. Шәаргьы саргьы ҳҿаҧхьа дҵа хаданы иқәгылоуп ҳтәылаҟны азинлеишәа аҭышәынтәалара даҽа ҩаӡарак ахь ахагалара. Ари аус аҟны ҳаидгыланы, ҳажәҩахыр еибыҭаны аус ҳуроуп", — иҳәеит Рауль Ҳаџьымба.
Аҩныҵҟатәи аусқәа рминистр Гарри Аршба Ахада иҭабуп ҳәа иеиҳәеит ииҭаз агәрагаразы.
"Раҧхьаӡа иргыланы, азакәан анагӡара хылаҧшра асҭалоит, избанзар азакәанмчреи азинлеишәа аҭышәынтәалареи рыхьчара ауп ҳус зызку. Иахьаҭаху сшәывагылазаауеит, еилых ҟамҵакәа. Ҳтәылаҟны аоперативтә ҭагылазаашьа атәы лымҳаҭасла акәӡам ишыздыруа. Иҳамоу амчқәа зегьы еидкыланы, ацәгьоурақәа ҳарҿагылароуп", — иҳәеит Гарри Аршба.
Аҩныҵҟатәи аусқәа ҧасатәи рминистр, аҧыза-министр ихаҭыҧуаҩ Аслан Кобахьиа анапхгаҩ ҿыц ақәҿиарақәа изеиҕьеишьеит, иара иганахьала адгылара шиоуа азгәаҭаны.
"Раҧхьаӡара иргыланы, хьӡи-ҧшеи змоу аколлектив иҭабуп ҳәа расҳәар сҭахуп. Ҳтәылаҟны абас апатриот иашақәа ахьыҟоу, ҳҳәынҭқарреи ҳхьыҧшымреи зымҭиуа, изымҧсахуа ауаа ахьҳамоу гәахәара дууп. Шәыбжьара иҟоуп ишқәыҧшыз ҳзанааҭтә форма зышәҵаны, акыр шықәса раахыс ҳаҧсадгьыл амаҵ азызуа. Иҟаҵатәу даара ирацәоуп. Министр ҿыцс иахьа иҟаҵоу аҧышәа ду змоу оперативтә усзуҩуп. Иазгәоумҭар залшом, ҳтәылаҟны акриминогентә ҭагылазаашьа шыуадаҩу. Гәыкала ишәзеиҕьасшьоит ақәҿиарақәа, аҭынчра, аизҳазыҕьара", — иҳәеит Аслан Кобахьиа.
Аҵыхәтәантәи аҩышықәса рыла абри аҭыԥ аҟны ирыԥсаххьеит ԥшьҩык анапхгаҩцәа.
2015 шықәса мшаԥымза – лаҵарамза рзы министрс дыҟан Рауль Лолуа.
2015 шықәса лаҵарамза – жьҭаарамза рзы министрс дыҟан Беслан Ҳагба.
2015 шықәса жьҭаарамза инаркны 2016 шықәса ԥхынгәымзанӡа министрс дыҟан Леонид Ӡаԥшьба.
Нанҳәа 16 2016 шықәса рзы министрс дҟаҵоуп Аслан Кобахьиа. Аԥшьаша, жьҭаара 12 рзы Аԥсны Ахада Рауль Ҳаџьымба инапы аҵеиҩит Аԥсны Аҩныҵҟатәи аусқәа рминистр ҿыцс Аршба Гарри иаҭаразы.
