ГӘДОУҬА, жьҭаара 20– Sputnik, Бадри Есиава. Ҩымз раԥхьа Дәрыԥшь ақыҭан аӡымҩангагатә цәаҳәақәа рышьҭаҵара хацдыркит. Уахьынтәи аӡы роулараны иҟоуп Гәдоуҭа араион ақыҭақәа ԥшьбеи, Гәдоуҭа ақалақьи, абри атәы иҳәеит Гәдоуҭа араион Ахада ихаҭыԥуаҩ Вианор Ҭаниа.
"Дәрыԥшь ақыҭан иҟоу аӡыхь инаркны 12 километра инаӡоу аӡымҩангагатә трубақәа шьҭарҵахьеит. Иара иаҿыгахоит Мгәыӡырхәа, Ҟәланырхәа, Абӷархықә, Жәандәрыԥшь ақыҭақәа рахь аӡымҩангагақәа", — иҳәеит иара.
Ҭаниа иажәақәа рыла еиқәыԥхьаӡоу ақыҭақәа уажәраанӡа аӡы рымамызт. Уа инхо ауааԥсыра аӡы аҵеиџьқәеи аӡыхьқәеи рҟынтәи иртон. Аамҭа рацәак имгакәа урҭ рпроблема аӡбра аиуеит.
Аилахәыра "Гәдоуҭаргылара" аусзуҩы Владимир Смыр еиҭеиҳәеит аусурақәа ишрыдгалаз ԥшь-бригадак, бригада-цыԥхьаӡа дасу рхатә ҵакырадгьылқәа шырзеихшаз, аусурақәа рымҩаԥгаразгьы аҭакԥхықәрақәа шрыду.
