АҞӘА, жьҭаара 24– Sputnik, Сариа Кәарацхьелиаԥҳа. Афонд "Ашана" хылаԥшра знаҭо Саид Жьиба қәҿиарала аоперациа изыруит Ҭырқәтәылатәи ахәышәтәырҭа "Аджибад" аҟны ҳәа Sputnik акорреспондент илзеиҭалҳәеит афонд адиректор Мактина Џьынџьалԥҳа.
Ахәыҷы аоперациа изызуаз аҳақьым, апрофессор Мемет Озек иажәақәа рыла аоперациа ԥшь-сааҭк инарзынаԥшуа имҩаԥысуан. Ахәыҷы ихдырраҿы ианаамҭаз дааит иҭагылазаашьа ҭышәынтәалоуп.
Имҩаԥгоу аоперациа иалнаршоит Саид хәыҷы ихала дтәартә еиԥш аҭагылазаашьа.
Саид аоперациа ашьҭахьтәи аиҭашьақәыргыларатә аамҭа дахысроуп. Уи жәамшҟа аҭахуп. Уи ашьҭахь иара иҩныҟа дхынҳәуеит.
Саид Жьиба ицхырааразы аԥареизгара хацыркын 2017 шықәса цәыббрамзазы. Мактина Џьынџьалԥҳа ишылҳәаз ала еизгатәыз миллионки 620 нызқь мааҭи Аԥсны ауааԥсыра еизыргеит хымчыбжьа рыҩныҵҟала.
Агәыҳалалратә фонд "Ашана" 2008 шықәса рзы Аҟәа иаԥҵан. Афонд ачымазара ӷәӷәа змоу ахәыҷқәа рзы аԥареизгара еиҿнакаауеит.
