АҞӘА, жьҭаара 24 – Sputnik, Сариа Кәарацхьелиаԥҳа. Самсон Ҷанба ихьӡ зху Аԥсуа драматә театр аинтернет аҿы ахатә саит аиуит, абри атәы Sputnik иазеиҭаиҳәеит атеатр аиҳабы Адгәыр Џьениа.
"Асаит аҿы еилукаар ҟалоит ақәыргыламҭақәа ирыҵыркуа ажәабжьқәа, артистцәа рбиографиеи рфотои, атеатри уи аусзуҩцәеи рҭоурых, иара убас ажәытә афишақәеи, ақәыргыламҭақәа ажәытә рфотоқәеи убар улшоит", — иҳәеит иара.
Џьениа иажәақәа рыла, асаит хәҭақәак еиҭа ихарҭәаахоит, анаҩсгьы иацҵахоит, иаарласны асаит аус аураны иҟоуп аԥсуеи англызи бызшәақәа рыла. Иазгәаҭан иҟоуп онлаин абилеҭкәа рыҭирагьы.
Аԥсуа театр аԥҵан 1931 шықәсазы, уи ашьаҭаркҩыс дыԥхьаӡоуп Дырмит Гәлиа.
