Сариа Кәарацхьелиаԥҳа, Sputnik
Аҭҵаарақәа иаадырԥшит есышықәса адунеи аҿы 5 миллионк инарзынаԥшуа ауааԥсыра агрипп чымазара шрыхьуа, урҭ рахьынтә 250 нызқьҩык рыԥсҭазаара иалҵуеит. Ирацәаҩуп уи иамыхәаԥшкәа алаҵа аҟаҵара мап ацәызкуа.
Аԥсны асанитартә ҳақьым хада Лиудмила Скорик лажәақәа рыла, алаҵа мап ацәызкуа аиҳараҩык риммунитет иақәгәыӷуеит.
"Згәабзиара иахылаԥшуа ауааԥсыра ачымазара рхыргар алшоит, аха рааигәа иҟоу рзы уи шәарҭоуп. Ахәыҷқәеи зықәрахь инеихьоу ауааи ачымазара рыԥсҭазаара ашәарҭара иҭанаргылар алшоит", — еиҭалҳәеит Лиудмила Скорик.
Зықәрахь инеихьо ауаа рзы аҿк чымазара шәарҭоуп.
"60 шықәса ирҭысхьоу агрипп чымазара бааԥсыла ирхыргоит. Иара егьырҭ рцәеижьы иалоу ачымазарақәа анырра анаҭоит, зны-зынла ианрызхымгогьы ыҟоуп", — азгәалҭеит аҳақьым.
Sputnik Аԥсны аредакциаҿы агрипп ачымазара аҟнытә алаҵа ҟарҵеит.
"Хаҭалатәи аҿырԥшы ала, ауаа алаҵа шшәарҭам атәы агәра ргоит. 30 секунд ҵхьеит алаҵа ҟасҵеижьҭеи, ишыжәбо еиԥш сыԥсы ҭоуп – дахлафаауеит Sputnik Аԥсны аредактор хада Дмитри Нездоровин – Ҳхы мацара акәым ҳакәша иҟоу ауааԥсырагьы ирызхәыцтәуп. Аҩажәатәи ашәышықәсазы ицәырҵыз ачымазара Европа азбжа ннарҵәеит. Иахьа иҟоуп уи уацәызыхьчаша, нас изыҟаумҵари. Ишәарҭоу ишәарҭаму, уи азҵаара аҭак ҟарҵоит аҳақьымцәа, алаҵа ахаҭабзаиразы аҭакԥхықәра зхахьы изго".
Аԥсны ауааԥсыра алаҵа рзыҟарҵалоит ҳазҭоу ашықәс нҵәаанӡа араионтәи ақалакьтәи хәышәтәырҭақәеи аполиклиникақәеи рҿы хәыда-ԥсада. Аҳақьымцәа алаҵа зегьы ирызхоит ҳәа азгәарҭеит.
