Акыр шықәса инеиԥанкыланы аполитикатә репрессиақәа ирылаӡыз ирызкны ашәҟәы аиқәыршәара иаҿу ажурналист, ашәҟәыҩҩы, Екатерина Бебиапҳа Sputnik акорреспондент Рада Ажьиԥҳа данлыҿцәажәоз дазааҭгылеит харада хара зыдҵаны идырӡыз рҭоурых аидкылара дшалагази, ашәҟәы аԥхьаҩцәа рнапаҿы ироуратә ианыҟало аамҭеи ртәы.
Ажурналист Екатерина Бебиаԥҳа 30 шықәса инреиҳаны иҵуеит 1937–тәи ашықәсқәа рзы харада ахара зыдҵаны иҭархаз аԥсуаа рсиақәа ашьақәыргылареи, хаз шәҟәны аиқәыршәареи даҿуижьҭеи. Лара лажәақәа рыла қыҭацыԥҳьаӡа дцаны арепрессиа иалаӡыз рыхшаареи, дара здыруази, уи иацәынхази ргәалашәарақәа анылҵон, уи инаваргыланы Аԥснытәи архивқәа рыҟны аус луан.
Ажурналист Екатерина Беиаԥҳа 30 шықәса рыҩнуҵҟа еидылкылаз аматериал ҩ-томкны иҟоу ашәҟәы ҭыҵратә еиԥш иаарласны аҭыжьра иазлырхиоит.
