АҞӘА, абҵара 1 – Sputnik, Бадраҟ Аҩӡба. Аԥснытәи акаратистцәа ҿарацәа уажәы Москва аҽазыҟаҵарақәа ирҿуп.
"Косики карате азы адунеи ачемпионат раԥхьаӡа акәны Урыстәыла имҩаԥысуеит. Адунеи аҟны ари аспортхкы 40 шықәса раахыс ахархәара амоуп", — ҳәа ҳкорреспондент изеиҭеиҳәеит Аԥсны косики карате азы Афедерациа аиҳабы Демис Адлеиба.
Иара иазгәеиҭеит ҳаспортсменцәа Аԥсны абираҟ иаҵагыланы ишықәгыло.
"Косики карате аҟны еиҳарак аԥыжәара рымоуп иапониатәи аспортсменцәа, Канадеи Америкеи рспортсменцәа. Атурнир иалахәхоит арабтәи атәылақәа рҟынтәгьы аспортсменцәа", — иҳәеит иара.
Демис Адлеиба иажәақәа рыла Аԥснынтәи 11-ҩык, 15-шықәса рҟынӡа зхыҵуа аспортсменцәа алахәхоит.
Аԥсны косики карате азы Афедерациа аиҳабы Демис Адлеиба иажәақәа рыла аспортсменцәа иахәҭаны иҟоу азыҟаҵара рымоуп.
Ачемпионат иалахәхоит адунеи атәылақәа 20.
Косики карате —ХХ ашәышықәса 70-тәи ашықәсқәа рынҵәамҭазы ицәырҵит, иапониатәи аҟазацәа раԥшьгарала.
