АҞӘА, абҵара 1 –Sputnik, Бадраҟ Аҩӡба. Риҵатәи амилаҭтә ҳәарԥссарра аҟны сынтәазы раԥхьатәи асы леит, ҳәа ҳзаалыцҳаит амилаҭтә парк адиректор Рита Лолуаԥҳа.
"Ҳара, ҳәарада, иахәҭаны иҟоу атехника азырхианы иҳаман асы арыцқьаразы", — лҳәеит лара.
Амилаҭтә парк адиректор лажәақәа рыла иацы илеиз ақәаршҩы ашьҭахь аӡиаҟны ҩ-метрак рҟынӡа аӡы аҽаҳаранакит.
"Амҩақәа аӡы рныланы ицон. Убри азы иҟан ашәарҭа амҩаҿ автомашьынақәа аӡы иқәнаӡәӡәаар ҳәа. Абри инадҳәаланы амҩақәа аҳаркит", — лҳәеит Лолуаԥҳа.
Ақәаршҩы иахҟьаны амҩақәа зҿысуа ахрақәа рҟны аҭацәырақәа ҟалеит.
"Ҳара уажәы урҭ аҭацәырақәа ирзаауша ҳазхәыцроуп. Џьара-џьара абетон ҭарҭәатәуп, џьара-џьаргьы ахаҳә ҭаҳаԥсар азхар ауеит", — лҳәеит апарк адиректор.
Аҭыԥ ахь инеит анџьнырцәа. Урҭ аҭагылазаашьа ҭырҵаауеит, Риҵаҟа ахаларазы амҩақәа ршәарҭадара еиҿыркаауеит.
Риҵатәи амилаҭтә ҳәарԥссарра адиректор Рита Лолуаԥҳа иаҳзеиҭалҳәеит апарк ахь уҩазго амҩа аныҟәаразы ишәарҭамкәа ианыҟоу — ишаарту.
