АҞӘА, абҵара 6 – Sputnik, Бадраҟ Аҩӡба. Аҟәатәи ахәыҷы-қәыԥштә спорттә школ №1 ашьапылампыласыҩцәа хәыҷқәа аразны ҳзааргеит атурнир аҟынтә ҳәа ҳзеиҭалҳәеит Аҟәатәи ахәыҷы-қәыԥштә спорттә школ №1 адиректор Татиана Емхааԥҳа.
"Атурнир ахь ҳара иҳашьҭит 2008 шықәса рзы ииз аспортсменцәа хәыҷқәа. Атурнир иалахәын Москва, Балашиха, Шәача ркомандақәа" ҳәа лҳәоит лара.
Ҳаспортсменцәа ишрылшоз ала ибзианы рхы аадырԥшит, алҵшәа бзиагьы ҳдырбеит лҳәеит лара.
Аԥсуа шьапылампыласыҩцәа зцыхәмаруаз акомандақәа акыр иӷәӷәан, аха дара ахаарԥшра рылшеит ҳәа азгәалҭеит Емхааԥҳа.
"Акоманда узықәгәыӷша командоуп. Ҭабуп ҳәа расҳәар сҭахуп адгылара ӷәӷәа ҟазҵаз аҭаацәа. Урҭ реиҳараҩык рхәыҷқәа ирыцны атурнир ахь ицеит", — лҳәеит аспорттә школ адиректор.
Аԥсуа команда алахәыла Никита Мишьелиа атурнир аҿы иреиӷьыз ажәылаҩ ҳәа далкаан.
