АҞӘА, абҵара 6 – Sputnik, Бадраҟ Аҩӡба. 13-тәи ареспубликатә арра-спорттә хәмарра "Аиааира" Аԥсны ишымҩаԥысыз атәы еиҭалҳәоит Аҟәатәи ахәыҷы-қәыԥштә спорттә школ №1 адиректор Татиана Емхааԥҳа.
"Аиндаҭларақәа рхы рыладырхәит акомандақәа ааба. Бжь-командак араионқәа рҟынтәқәа роуп, акы – Аҟәа ақадлақь акомандоуп", — лҳәеит лара.
Аиндаҭларақәа мҩаԥысуан еиуеиԥшым адисциплинақәа рыла.
"Уаанӡатәи ашықәсқәа раантәи ахәмаррақәа реихшьаалақәа рыла имаҷҩым занааҭс аррамаҵзура алызхуа иалагаз. Ирацәаҩуп арра-спорттә хәмарра "Аиааира" иалахәыз рҟынтә арратә ҵараиурҭақәа ирҭалаз", — лҳәеит Емхааԥҳа.
Лара иазгәалҭеит аиндаҭларақәа раан аҳҭнықалақь акоманда шамахамзар еснагь аԥыжәара шамаз, аха аҵыхәәтантәи аҩышықәса урҭ ишраԥыргаз егьырҭ акомандақәа.
Арра –спорттә хәмаррақәа мҩаԥысуан Баӷмаран архәҭа ахьгылоу аҭыԥ аҟны.
"Аӡбаҩцәас иҳамаз Атәылахьчара аминистрра амаҵзурауаа ракәын. Ҳәарада зегьы ишахәҭоу еиԥш еиҿкаан", — лҳәоит лара.
Аҵара аминистрра акәзар иазнархиеит алахәылацәа рзы аԥхьахәқәа: амедалқәа, ахраҿақәа, аҳаҭыртә шәҟәқәа.
"Дарбанызаалак алахәыла иҭан ампылқәа. Ахәыҷқәа зегьы агәеизҳара рыманы еимпит", — лҳәеит лара.
Аиндаҭларақәа иара убасгьы имҩаԥысуан Аԥснытәи аҳәынҭқарратә лицеи-интернат аҟны.
