ГАГРА, абҵара 13 — Sputnik, Саида Жьиԥҳа. Жәамш ирылагӡаны, Пицунда, аӡиа Инкыҭ аҟны, афлыкатә спорт азы, Санкт-Петербургтәи еизгоу ахәыҷтәы команда аҽазыҟаҵарақәа мҩаԥнагалоит.
Урыстәыла афлыкатә спорт зҽаԥсазтәыз азыҟаҵаҩ, Санкт-Петербургтәи еизгоу ахәыҷтәы команда азыҟаҵаҩ Ольга Медведева иҳаиллыркааит, ԥшьышықәса раахыс, аӡиа Инкыҭ аҟны аҽазыҟаҵарақәа шымҩаԥырго. Уи нахыс, дара ркоманда алахәхоит, Урыстәыла еиҿкаахо афлыкатә спорт азы еиуеиԥшым аицлабрақәа.
"Ҳара Санкт-Петербург аҽазыҟаҵарақәа ахьымҩаԥаҳгоз аӡиақәа уажәшьҭа аҵаа рхылахьеит. Пицундатәи аҳауа зҩыдеи, аӡиа аҭагылазаашьеи даара ицхыраагӡатәуп ԥхьаҟатәи ҳаицлабрақәа рзы. Аиашазы, аспортсменцәа қәыԥшцәа азнак азы ирцәыцәгьоуп афлыка аӡиа Инкыҭ аҟны арныҟәара, уи ахьанҭара иахҟьаны, аха мышқәак ааҵуаны иашьцылоит", — ҳәа азгәалҭоит азыҟаҵаҩ.
Ольга Медведева Аԥсны абҩарҵәыреи аспорти рзы аҳәынҭқарратә Еилакы анапхгара иҭабуп ҳәа ралҳәоит, Пицундатәи аӡиаҟны аҽазыҟаҵарақәа рымҩаԥгаразы ацхыраара ахьлырҭо.
Мызкы ашьҭахьгьы, аӡиа Инкыҭ аҟны афлыкатә спорт азы ҩаԥхьа Урыстәылатәи егьырҭ еиуеиԥшым акомандақәа аҽазыҟаҵарақәа мҩаԥыргараны иҟоуп.
