АҞӘА, абҵара 12 – Sputnik, Бадри Есиава. Аԥсны Аҳәынҭқарра Ахада Рауль Ҳаџьымбеи Науру Ареспублика Ахада Барон Вакаи еиԥылеит абҵара 12 рзы, амҽышаҽны.
"Науру Ареспубликеи Аҧсны Аҳәынҭқарреи реизыҟазаашьақәа кыршықәса имҩасуеит. Ҳдипломатиатә еизыҟазаашьақәа шьақәыргылан 2009 шықәса ҧхынҷкәынмзазы. Уи аахижьҭеи усутә ныҟәарыла ҳтәыла иаҭаахьан имаҷымкәа шәделегациақәа, урҭ шаҳаҭра руан аиҩызаратә, агәрагаратә, апартниорратә еимадарақәа шҳабжьоу. Дара Аҧсны жәларбжьаратәи аренаҟны еиҳау аилкаара аиура иацхраауеит. Гәыҩбара сымам 2016 шықәсазы анапы зҵаҳҩыз Науру Ареспубликеи Аҧсны Аҳәынҭқарреи реиҩызареи русеицуреи рзы аиқәшаҳаҭра инақәыршәаны, ҳаиныррақәа рыҽшдырҭбаауа. Ара шәыҟазаара ҳара ҳзы аҵак ду амоуп. Ҳаҭыр зқәу Вака ихаҵки сареи иахьа еибаҳҳәахьан, уажәтәи шәаара аҿҳәара шкьаҿу, аха ҧхьаҟатәи шәааираан ҳҭыҧҧшӡарақәеи, ҳекономикеи, ҳажәлар рыҧсҭазаашьеи еиҳа иааигәаны ижәдырырц аҭагылазаашьа шәоуп ҳәа. Хымҧада, уи ҳаизыҟазаашьақәа анырра бзиа рынаҭон. Иахьа Аҧсни Науруи рзы акрызҵазкуа азҵаарақәа ҳрылацәажәап ҳәа агәаанагара сымоуп", — иҳәеит Рауль Ҳаџьымба Барон Вака иахь ихы нарханы.
Аԥсны Ахада иазгәеиҭеит аделегациа Аԥсны рыҟазаара аамҭа акыр ишкьаҿу.
Барон Вака Рауль Ҳаџьымба иҭабуп ҳәа еиҳәеит иажәа ԥхақәеи исасдкылара ҟәаандеи рзы. Иара инаҵшьны иҳәеит Науруи Аԥсни реиҩызаартә еизыҟазаашьа агәахәара ду шинаҭо атәы.
"Иҭабуп, ҳаҭыр зқәу Ахада. Сколлегацәеи сареи Аҧсныҟа ҳааҭаразы уажәааигәа ҳаилацәажәеит. Уи ҳажәларқәа рыбжьара аиҩызареи аидгылареи шаҳаҭрас ирзаҳур ҳҭахын. Уаанӡагьы арахь сааир акәын, аха еиуеиҧшым амзызқәа ирыхҟьаны, иахызгон. Ус иага иҟазаргьы, акрызҵазкуа ахҭысқәа раан Аҧсныҟа иаауан сколлегацәа, Апарламент Аиҳаби аминистрцәеи. Урҭ зегьы сыхьӡала акәын ишаауаз, аинформациагьы нхарҭәааны исызнаргон. Уи сара сзы игәахәароуп" — иҳәеит Науру Ахада.
Иагьациҵеит Аԥсны иҟоу апроблемақәа адунеи зегьы аҿы аҭыԥ рыманы ишыҟоу.
Рауль Ҳаџьымба иазгәеиҭеит атәылақәа рыҩба рыбжьара анапы зҵаҩу аиқәшаҳаҭрақәа аиҩызареи аусеицуреи ишырзырхо.
Абҵарамза 12 рзы Науру Ареспублика Ахада Барон Вака усутә ныҟәарыла Аҧсны даҭааит. Науру Ареспублика Ахада напхгара зиҭо аделегациа иалоуп Апарламент адепутат, Агәабзиарахьчареи аҵареи рминистр Чармин Скотти, Апарламент адепутат, иҷыдоу анапынҵақәа рзы Ахада иабжьгаҩ Милтон Диуб, ЕАР аҟны Науру Ареспублика Есымшатәи ахаҭарнак Марлен Моузес.
Ареспублика Науру Аԥсны ахьыԥшымра азханаҵеит ԥхынҷкәын 15, 2009 шықәса рзы.
