АҞӘА, абҵара 13 – Sputnik. США апрезидент Дональд Трамп Америкеи Урыстәылеи русеицура адунеи зегьы азы хра аманы иҟоуп ҳәа ахиҳәааит. Абри атәы аанацҳауеит РИА Новости.
Аҳәамҭа ҟаҵан Ханои, Виетнам ахада Чан Даи Куанги иареи еицымҩаԥыргаз апресс-конференциаҟны.
Уаанӡа Трамп Twitter аҟны иҩуан Аҩадатәи Кореиеи, Шьамтәылеи, Украинеи атерроризми ирыдҳәалоу акризисқәа рҭыԥ иқәҵатәуп, абри аҟны Урыстәыла ацхыраара ду ҳнаҭоит ҳәа.
Дональд Трамп, АТЕС асаммит аҳәаақәа ирҭагӡаны Владимир Путины иареи реиԥылара ибзиоуп ҳәа ахиҳәааит. Трамп игәаанагарала Шьамтәыла аганахь ала Урыстәылеи Америкеи русеицура зқьыла аԥсҭазаарақәа еиқәнархоит.
Путини Трампи ишьақәдырӷәӷәеит атеррористтә гәыԥ "Исламтәи аҳәынҭқарра" шьаҭанкыла иқәырхаанӡа иаҿагыланы ишықәԥо.
