АҞӘА, абҵара 14 – Sputnik, Амра Амҷԥҳа. Акциа "Агәы аԥхарра" инақәыршәаны аизгара иалагеит аӡынмаҭәа. Абри атәы радио Sputnik Аԥсны иазеиҭалҳәеит АУЕ "Кьараз" анагӡаратә директор Камма Гоԥиаԥҳа.
"Ҳапроектқәа ираԥхьатәиқәоу иреиуоуп асоциалтә дәқьан. Амаҭәа ԥха зҭахны иҟоу ирымоуп алшара уахь инеины ирыгу-ирыбзоу агара. Ҳусуратә уадаҟны иаартуп амаҭәадкыларҭа. Ес-хәаша амаҭәа зҭаху ааины иргоит. "Агәы аԥхарра" акциа ҳасабла ес-ҭагалан, аӡын аламҭалаз имҩаԥаагоит. Иара азҳархоит Адунеизегьтәи аразра амш", — лҳәоит Гоԥиаԥҳа.
Акция "Агәы аԥхарра" 10-20 мшы рҟынӡа ицоит. Иара аҳәаақәа ирҭагӡаны изҭаху зегьы ирылшоит иҿыцу, мамзаргьы ишәҵа-шәыху амаҭа изҭахны иҟоу рызнагара.
Адунеизегьтәи аразра амш аҳәаақәа ирҭагӡаны Аԥсны ашколқәа рҟны имҩаԥган "Аразра аурок" захьӡу ауснагӡатә.
"Аҵаҩцәа амаҭәа еизыргеит. Дара ргәаҳәон ирымоу рҩызцәа ирыцеиҩыршарц. Ашколқәа рҟынтәи аҭел иаҳзасуеит еизгоу ацәамаҭәа ҳара ҳахь иааргарц", — ҳәа еиҭалҳәоит Камма Гоԥиаԥҳа.
Агәыҳалалратә уаажәларратә еиҿкаара "Кьараз" шьаҭаркын 2015 шықәса, мшаԥымзазы. Иара аусура хацыркхеит зылшарақәа ԥку аҭаацәарақәа рзы амаҭәа аизгара акциала. Афонд ахаҭарнакцәа ақыҭахәыҷқәа рзы еиҿыркаауеит акультуратә уснагӡатәқәа: иааргоит атеатр ахь, иддырбоит Аԥсны аԥшӡарақәа.
