АҞӘА, абҵ 16 — Sputnik. Сырма Ашәԥҳа. Ассоциациа аиҿкаара хықәкыс иамоуп агәыҳалалра, асоциал, акультура иадҳәалоу апроектқәа аус еицрыдулареи, ауаажәларра рыҿиара ацхыраара аҭареи, аиҿкаарақәа ринтересқәа-Ассоциациа алахәылацәа рзин ахьчареи, ауаажәларратә еиҿкаарақәа рыбжьара аимадарақәа рнаҩсгьы, аҳәынҭқарратә структурақәа аус рыцура, ауаажәларра ринтересқәа рыхьчареи ауп.
Азеиԥш еизара иаднакылаз аӡбамҭала, еицҿакны Ассоциациа хантәаҩыс далырхит "Жәларбжьаратәи афонд Аԥсны" ахада Сенер Гогәуа.
"Ауаажәларратә еиҿкаарақәа реимадара, зымҽхак ҭбаау апроектқәа рынагӡара анырра арҭоит. Аҭыԥантәи ауаажәларратә еиҿкаарақәеи, икоммерциатәым аиҿкаарақәеи рыбжьара аинформациа аиҭныԥсахлареи, хымԥада агәыҳалалреи, асоциал, акультуреи уҳәа апроектқәа ирыдҳәалоу азҵаарақәа рыӡбараҟны акыр ихәарҭоуп", — ҳәа азгәеиҭеит Сенер Гогәуа.
"Аԥсны икоммерциатәым аиҿкаарақәа рассоциациа" иалаларц зҭаху рзы ашәқәа иаартуп.
Раԥхьатәи аизараҟны, Ассоциациа далаларц ажәалагала ҟалҵеит Зураб Ачба ихьӡ зху арҵаратә центр "Мир без насилия" аиҳабы Далила Ԥлиаԥҳа. Иҟалҵаз ажәалагала иақәшаҳаҭхеит ассоциациа аиҿкааҩцәа.
"Аԥсны икоммерциатәым аиҿкаарақәа рассоциациа" иалоуп аиҿкаарақәа: ауаажәларратә еиҿкаара "Жәларбжьаратәи афонд Аԥсны", "Аԥсны анацәа аҭынчреи асоциалтә иашареи" рзы аиҿкаара, акультура гәыҳалалратә фонд "Ашана", агәыҳаларатә программақәа рцентр "Ааглыхреи аусдкылаҩцәеи Реидгыла", агәыҳаларатә фонд "Аԥсны ахәыҷтәы фонд", " Аԥсны ихьыԥшым асахьаҭыхыҩцәа Реидгыла "Аԥсны-Арт", "Аҟәатәи ақәыԥшцәа рыҩны", Ауаажәларратә еиҿкаара "Аԥсны аус знапы алаку аҳәсақәа", "Зхы иамыхәо ахәыҷқәа рҭаацәа рассоциациа", агәыҳалалратә фонд "Аԥсны ауаажәларра аҿиара афонд", агәыҳаларатә фонд "Агәыҳалалра ацҳаражәҳәаҩцәа", Ассоциация "Инва-Содействие".
