АҞӘА, абҵара 17— Sputnik. Амашьын Toyota Prado ианеихсыз ахәрақәа зауз Аԥсны атәылауаҩ Сабри Барцыц Гәдоуҭатәи араионтә хәышәтәырҭаҿ иԥсҭазаара далҵит. Абри атәы ааицҳаит ахәышәтәырҭа аҳақьым хада Ҳаџьараҭ Шамба.
"Ахәышәтәырҭа аҳақьымцәа ирылшоз зегь ҟарҵеит ахә иԥсы аиқәырхаразы, аха иаҳзалмыршеит", — иҳәеит иара.
Гәдоуҭа, Аӡеиқәа ааигәара автомобиль Toyota Prado еихсит ҳәа Sputnik иазааицҳаит Гәдоуҭа араион амилициа аиҳабы Заур Дасаниа.
"Ахҭыс ҟалеит ахәылбыҽха, асааҭ 20.00 рзы, Аӡеиқәа ааигәара. Иҟалаз ахҭыс инадҳәаланы апрокуратура ахҭыс аҭҵаара иаҿуп. Ашьаус хацыркуп", — иҳәеит Дасаниа.
