АҞӘА, абҵара 21 – Sputnik, Бадраҟ Аҩӡба. Шьукин ихьӡ зху атеатртә институт Аԥсуа студиа астудентцәа Москва иқәдыргылеит аспектакль "Кьоџьаа рҭыӡшәа". Абри атәы еиҭеиҳәеит радио Sputnik аҟны аспектакль арежиссер Александр Коручеков.
"Агәыԥ иалоу зегьы даара бзиа избоит. Шықәсык аԥхьа аус еицаауан, нас аҽазныкгьы. Уажәы, цәыббрамза аахыс арепетициақәа мҩаԥаагон", — иҳәеит иара.
Аусурақәа рыбжьара аамҭа абжьалара зыхҟьаз аинститут аҟны аҵаратә процесс амҩаԥысроуп иҳәеит Коручеков.
"Астудентцәа рхалагьы рхы аус адырулон. Аспектакль рхатә елементқәагьы аналаргалоз ыҟан. Сара адҵа рысҭон, дара аус руан", — иҳәеит иара.
Арежиссер иазгәеиҭеит аԥсуа студентцәа ахәмарра агәаҳәара шрымоу, уи акырӡа хра аманы иҟоуп ҳәа.
Шьукин ихьӡ зху атеатртә институт Аԥсуа студиаҟны аҵара рҵоит ааҩык Аԥснытәи астудентцәа: ҭыԥҳаки быжьҩык арԥарацәеи.
Уаанӡа аҽа ԥшьҩык аҵара рҵон абри аинститут аҿы, аха акурс анапхгаҩы Елена Одинцова лажәақәа рыла еиуеиԥшым амзызқәа ирыхҟьаны рҵара аанрыжьит.
