АҞӘА, абҵара 21 – Sputnik. Очамчыреи Тҟәарчали араионқәа рҟны афымцацәаҳәақәа аԥша иԥнаҵәҵәеит. Уи иахҟьеит афымцалашара арцәарагьы. Абри атәы аанацҳауеит "Амшынеиқәафымцамч" апресс-маҵзура.
"АУН "Амшынеиқәафымцамч" аихшаратә хәҭақәа рдиректор ихаҭыԥуаҩ Валери Пентиухов иазгәеиҭеит амашәырқәа ахьыҟалаз аҭыԥқәа рҟны аусутә бригадақәа аиҭашьақәыргыларатә усурақәа ишырҿу", — ҳәа аҳәоит апресс-маҵзура адырраҭараҟны.
"Амшынеиқәафымцамч" апресс-маҵзура наҟ-наҟгьы адыррақәа ҟанаҵалоит афымцалашара аиҭашьақәыргыларазы аусурақәа рымҩаԥысшьа иазкны.
