АҞӘА, абҵара 30— Sputnik. Ԥхынҷкәын 10 рҟынӡа Бали аҭагылазаашьа ҷыда аамҭа иацырҵеит. Макьанагьы иҟоуп ашәарҭа аццышә ахаларазы. Абри атәы аанацҳаит Sputnik Беларусь.
Авулкан Агунг "аԥсы ҭалеит" абҵара 21 рзы. Авулкан алҩа халеит 700 метра ҵәҩанҵәыҟа. Амҽыша аҩбатәи амцахәыҵҟьара ҟалеит, алҩагь ԥшь-нызқь метра ихалеит. Аҭыԥантәи амчрақәа аҳаиртә баӷәаза аҭагылазаашьа ҭышәынтәалаанӡа ҳәа иадыркит.
Уажәы адгьылбжьаха Ломбок ааигәара иҟоу аҩбатәи аҳаиртә баӷәазагьы шадыркуазы аҳәамҭа ҟанаҵеит Индонезиа аграждантә авиациа анапхгара. Уаанӡа, абҵара 27-29 рзы Бали аҳаиртә баӷәаза ахьаркыз иахҟьаны атуристцәа Ломбокҟа инеиуан, уаантәи аԥырразы.
Авулкан "аҿыхара" инамаданы Бали аҳаиртә баӷәаза аркын. Иахьатәи аамҭазы рҭыԥқәа ирхыгоуп 43 000-ҩык аҭыԥантәи ауааԥсыра, урҭ рынхарҭақәа авулкан иахьацәыхарам иахҟьаны.
100 000-ҩык рҟынӡа ирабыжьгоуп рыҩнқәа аанрыжьырц.
