АҞӘА, ԥхынҷкәын 4 — Sputnik. Урыстәыла Ахада Владимир Путин Урыстәыла Аҳәынҭқарратә Думахь аратификациазы инаишьҭит Аахыҵ Уаԥстәыла арратә ҟәшақәак Урыстәыла арратә мчрақәа ирылаларц азы Аахыҵ Уаԥстәылеи Урыстәылатәи Афедерациеи рыбжьара анапы зҵаҩу Аиқәшаҳаҭра. Абри атәы аанацҳауеит РИА Новости.
Уаанӡа Урыстәыла Аиҳабыра ибзиоуп ҳәа ишьақәнарӷәӷәахьан, атәыла Ахада иахь инашьҭтәуп ҳәа аӡбахьан Аахыҵ Уаԥстәыла арратә ҟәшақәак Урыстәыла арратә мчрақәа ирылаларц азы Аахыҵ Уаԥстәылеи Урыстәылатәи Афедерациеи рыбжьара анапы зҵаҩу Аиқәшаҳаҭра.
Аиқәшаҳаҭра анапы аҵаҩын хәажәкыра 31 рзы.
"Урыстәыла Аҳәынҭқарратә Думахь аратификациа азуразы инасышьҭуеит Аахыҵ Уаԥстәыла арратә ҟәшақәак Урыстәыла арратә мчрақәа ирылаларц азы Аахыҵ Уаԥстәылеи Урыстәылатәи Афедерациеи рыбжьара Москва, хәажәкыра 31 2017 шықәса рзы анапы зҵаҩу Аиқәшаҳаҭра" ҳәа аҳәоит Аҳәынҭқарратә Думахь инашьҭу ашәҟәаҟны.
Иазгәаҭоуп Аахыҵ Уаԥстәылатәи арратә ҟәшақәа рыррамаҵзурауаа Аахыҵ Уаԥстәыла игылоу Урыстәылатәи арратә базаҟны аррамаҵзура рхырго иалагоит ҳәа, аилаӡаратә формала.
Урыстәылатәи ар рҟны еилаӡарыла аррамаҵзура иахысуа Аахыҵ Уаԥстәыла аррамаҵзурауаа ареспублика арратә мчрақәа рҟынтәи рхы иақәиҭтәуп.
