АҞӘА, ԥхынҷкәын 26 – Sputnik. Борис Еифман ибалет Санкт-Петербургтәи аҳәынҭқарратә академиатә театр априма-балерина Лиубовь Андреева апроект "Ты супер! Танцы" алахәылацәа дырԥылеит.
"Сара сгәысҽанымкәан ауп Лиубовь Андреевеи лыԥшәма Денис Климуки ҩ-сааҭктәи амастер-класс амҩаԥгарахь сышнарыԥхьаз. Иухамышҭыша хҭысуп. Дара сықәгыларақәа зегьы ишрыхәаԥшуаз сарҳәеит. Даара агәахәара ду снаҭеит", — лҳәеит Милена Тачулиаԥҳа.
Аҟазауаа ахәыҷқәа иддырбон акәашара аҷыдарақәа. Апроект алахәылацәа ракәзар, артистцәа рҿаԥхьа рмилаҭтә кәашарақәа икәашеит.
"Дара исдырбеит еиуеиԥшым акәашаратә комбинациақәа. Нас, сара схаҭа инасыгӡеит апроект аҟынтәи сномерқәа: "Драмы больше нет", "Дерево", — лҳәеит Тачулиаԥҳа.
Еицырдыруа абалерина иара убасгьы акәашаҩцәа қәыԥшцәа ирзеиҭалҳәеит ақәгылара аламҭалаз аҽеиқәкышьа амаӡақәа, агәыхыҭхыҭра аиааишьа.
"Ахәыҷқәа зегьы оумашәа иҟазауаауп. Рықәгыларақәа санрыхәаԥшуа аџьшьара сааннажьуам. Икәашалароуп. Уи шамахамзар зегьы ирылшоит", — лҳәеит Лиубовь Андреева.
Жәларбжьаратәи аинформациатә маҵзуреи арадиои Sputnik апроект "Ты супер! Танцы" алахәылацәа рзы ашықәс ҿыцазтәи аҳамҭа азнархиеит – Санкт-Петербург мчыбжьык аҟазаара.
Иара убасгьы амаҵзура аконкурсантцәа 18 шықәса рхыҵаанӡа есымзатәи астепендиа рзашәалоит, ианаамҭахо урыстәылатәи аҵараиурҭақәа рҭалараҿы ирыцхраалоит.
Sputnik (sputniknews.com) – Жәларбжьаратәи аинформациатә маҵзуреи арадиои Sputnik атәылақәа жәпакы рҟны амультимедиатә хабқәа амоуп.
Sputnik асаитқәа аус руеит 30 рҟынӡа бызшәа рыла. Ажәабжьтә лентақәа ракәзар, англыз, араб, акитаи, аиспан бызшәақәа рыла уахи-ҽни иҭыҵуеит.
