АҞӘА, ԥхынҷкәын 28– Sputnik. Аԥсны Аҩныҵҟатәи аусқәа рминистрреи Аԥсны Ашәарҭадаратә маҵзуреи русзуҩцәа аоперативтә експеримент амҩаԥгараан иааныркылеит амарихуана ҵәахны измаз хҩык амилиционерцәа. Абри атәы аанацҳауеит аминистрра апресс-маҵзура.
"Аԥсны Аҩныҵҟатәи аусқәа рминистрреи Аԥсны Ашәарҭадаратә маҵзуреи русзуҩцәа аоперативтә експеримент амҩаԥгараан иааныркылеит Драндатәи амилициа аҟәша аусзуҩцәа хҩык: аҟәша аиҳабы инапынҵақәа назыгӡо амилициа акапитан Адлеиба, аҟәша аиҳабы ихаҭыԥуаҩ, алеитенант еиҳабы Пертаиа, Ажара ақыҭа амилициа аҟәша аусзуҩ, амилициа амаиор Адлеиба", — ҳәа аҳәоит адырраҭараҟны.
Драндатәи амилициа аҟәша аиҳабы имаҵзуратә кабинет асеиф агәаҭараан Ашәарҭадаратә маҵзура аусзуҩцәа ирымԥыхьашәеит аиаҵәԥшшәхәы змаз амаҭәашьар зҭаз апакет.
"Иара убасгьы иԥшаан уи аҩыза апакет астол амгәаҟынгьы. Иԥшааз амаҭәашьар аекспертиза ианахрыжь ишьақәыргылан анаркотикатә маҭәашьар "марихуана" шакәыз" ҳәа аҳәоит апресс-маҵзура адырраҭараҟны.
Абри ахҭыс азы аматериал нашьҭуп Аԥсны Апрокуратура хадахьы, ашьаус хацыркуп.
