АҞӘА, ԥхынҷкәын 28– Sputnik, Бадри Есиава. Аԥсны Аԥыза-министр Беслан Барцыц игәрамгара азҵаара аилатәара амшхәаԥштә азҵаараҿы иарбазарц ажәалагала ҟаиҵеит адепутат Илиа Гәниа.
Гәниа ахәшьара аиҭеит атәылаҿы иҟоу асоциал-економикатә ҭагылазаашьа, атәыла аиҳабыра русушьа. Иара игәаанагарала 2018 шықәсазтәи абиуџьет иаанарԥшуеит атәыла аекономика акаҳара ишаҿу атәы.
Гәниа иажәалагала, аилатәара алахәылацәа рыбжьара аимак-аиҿак арҵысит. Адепутат Валери Агрба иазгәеиҭеит асеиԥштәи ажәалагала арегламент иаҿагылоит, уи иара иашьашәалоу апроцедурақәа ирхыжьтәуп ҳәа. Агрба диқәшаҳаҭхеит Аԥсны Ахада Иусбарҭа аиҳабы ихаҭыԥуаҩ Дмитри Шамбагьы.
Адепутат Баҭал Табаӷәуа иакәзар, ажәалагала арегламент еиланагом амшхәаԥштә азҵаарагьы иалагалазар ауеит азгәаиҭеит.
Апарламент аиҳабы ихаҭыԥуаҩ Саид Ҳаразиа игәаанагарала, абри азҵаараҿы аццакра аҭахым, даара ишәаны-изаны изызнеитәу зҵаароуп, иҳәеит иара.
Азҵаара амшхәаԥштә аҵаркразы абжьыҭираан 20-ҩык адепутатцәа уи иақәшаҳаҭхеит, 3-ҩык мап ацәыркит.
