АҞӘА, ԥхынҷкәын 29 — Sputnik, Сариа Кәарацхьелиаԥҳа. Аԥсны Аминистрцәа реилазаара аӡбрала Аҟәатәи афымцатә станциа аренда ирыҭахоит.
"Апроект иазыԥхьагәанаҭоит аобиект 25 шықәса ҳәа аренда рыҭара. Аренда ахәԥса иартәоит аобиект ахәԥсаҟынтәи 5%. Ахәшьаратә хәыԥса шьақәыргылахоит атехникатә инвентаризациа анымҩаԥыргалак ашьҭахь", — иҳәеит аекономика аминистр Адгәыр Арӡынба.
Аобиект аус ауразы анаплакы аинвестициа дуқәа аҭахны иҟоуп иҳәеит иара.
"Аԥсны аус зуа азакәанԥҵара инақәыршәаны иҟарҵараны иҟоу аиӷьтәрақәа зегьы Аԥсны ахатәтәрахьы ииасуеит", — иҳәеит Арӡынба.
Аминистрцәа реилазаараҟны аӡбра рыдкылан еицҿакрыла.
Аҟәатәи афмцатә станциаиахьатәи аамҭазы аус ауам. Иара аргылара иалаган 1934 шықәса рзы, аусура иалагеит 1948 шықәса рзы.
