АҞӘА, ажьырныҳәа 17 – Sputnik, Альбина Жьиԥҳа. Аҳәынҭқарратә аҿартә театр асезон хацнаркуеит аҭоурыхтә ақәыргыламҭа "Қьалашьбеи" ала иҳәеит апресс-конференциаҿы атеатр аиҳабы Аслан Еныкь. Иара иазгәаиҭеит аҿартә театр аус ауеижьҭеи, хышықәса рыҩныҵҟа, ари аабатәи аспектакль шаку.
"Ҳамҽхак ҳарҭабааит ҳәа ҳҳәар ҳалшоит, аха ҳусураҿы иҳамоуп ауадаҩрақәа жәпакы. Ақәыргыламҭа шьақәҳаргыларцаз актиорцәа рымацара азхом, даҭахуп адекорациақәа еиқәзыршәо, актиор ицәамаҭәа ҟазҵо. Абри зегьы аԥара ахшәааны ҳхатәы мчла иҟаҳҵоит", — иҳәеит Аслан Еныкь.
Атеатр адиректор иҳәеит аԥсуаа ҳҭоурых зҳәо ақәыргыламҭа аус адулара шгәаӷьыуацәаз. Иҭабуп ҳәа раиҳәеит аспектакль ҟаларацаз ацхыраара рызҭаз.
"Аҭоурыхтә ҵакы змоу аспектакль "Қьалашьбеи" шьақәгыларцаз, ажәлар рҿы инаҳгартә еиԥш ацхыраара ду ҟарҵеит аҟазара бзиа избо, уи аҿиара иацхраауа еиуеиԥшым анаплакқәа", — инаҵеишьит Еныкь.
30 шықәса инареиҳаны Аԥсны аҳра зуаз Қьалашьбеи иааикәыршан иҟаз ахҭыс дуқәа ахәаԥшцәа ирбар сҭахуп иҳәеит апиеса ақәыргылаҩ, Аԥсны Жәлар рартист Шьалуа Гыцба.
"Аԥсуа актиор ду Азиз Агрба, адраматә театр асценаҿы иқәиргылахьан Қьалашьбеи аҳра аниуаз аамҭа атәы зҳәо, Гаргь Гәлиа иповест ала "Асыс еиқәаҵәақәа". Усҟан уи апиеса аимак-аиҿак ду ахылҿиааит Қарҭтәыла аганахьала. Ақәыргыламҭа ықәган", — игәалаиршәоит Шьалуа Гыцба.
Иара иҳәоит адрама автор, Анзор Мықәба, аҭоурыхҭҵааҩцәа Қьалашьбеи дызшьыз ҳәа еиуеиԥшым агәаанагарақәа ирымоу атәы мҳәакәа, ихатәы азнеишьа, ихатәы аверсиа, шаку аҩымҭа ақәыргылара ахь дхьазырԥшыз.
"Анзор Мықәба аҭоурых аҿы еилыргам наҟ инышьҭаҵаны, ихәыцшьала, уи аҟазарахь ирханы, даҽа ԥсҭазаарак аҭаны иҩҩит апиеса", — азгәаиҭеит аспектакль ақәыргылаҩ.
Шьалуа Гыцба иҳәеит апиеса аспектакль алҵыртә еиԥш аџьабаа ду шадырбалаз.
"Аҩымҭа автор ианысирба нахыс абри акыр сзалхру ҳәа саахәыцит, аха зегьы акоуп сҽазыскит. Иҳалшоз ала аспектакль хатәрак алҵыртә еиԥш аус аауит. Иаанхаз ажәлар дырбара ауп", — иҳәеит ақәыргылаҩ.
Аҿартә театр асахьаркыратә напхгаҩы, "Қьалашьбеи" аҿы арольқәа руак наӡыгӡо Софа Агәмаа илҳәеит аспектакль аҽазыҟаҵарақәа аҵыхәтәантәи амшқәа рзгьы иагқәаз кыр шааԥшыз, уи атеатр ишахәҭәоу еиԥш иахьеиқәыршәам ауп изыхҟьазгьы азгәалҭеит лара.
"Актиор иуада данааҩныҵ нахыс уиацәажәаргьы иҭахым, иус дазхәыцуеит, ҳара ус акумкәа, адекорациақәа ҳарҽеиуеит, ареквизитқәа ҳармазеиуеит, иҟазҵаша уаҩ дҳамаӡам", — лгәы иаланы илҳәеит Софа Агәмаа.
Ақәыргыламҭа атәы дазааҭгыло Софа Агәмаа илҳәеит аԥсуаа Асланбеи иахь ирымаз абзиабара, иаб дишьит ҳәа иҟоу агәаанагара иахҟьаны, ишыӡыз.
"Аспектакль ахәыҷы инаиркны аду иҟанӡа иахәаԥшыр ауп, ажәлар ргәаанагарагьы ҳаҳар ҳҭахуп. Аҭоурыхтә ҩымҭаҿы жәак мацара амухыргьы уарҟьалар алшоит. Ақәыргылаҩи аҩымҭа автори аспектакль ахҭыс хада аарԥшраҿы ргәаанагарақәа ахьеиқәшәаз сгәы иаахәоит ", — азгәалҭеит Агәмаа.
Анзор Мықәба идрамала аҳәынҭқарратә аҿартә театр иқәнаргылаз апиеса "Қьалашьбеи" апремиера мҩаԥысуеит ажьырныҳәа 18- 19 рзы, Аԥсуа адраматә театр аҿы.
