АҞӘА, ажьырныҳәа 23– Sputnik, Бадраҟ Аҩӡба. Аусуразы аҳәынҭинспекциа аусура иалагеит иҳәеит Аџьеи аусура амазаареи, асоциалтә еиқәыршәареи рминистрра аусзуҩ Џьон Агрба радио Sputnik аинтервиу анеиҭоз 2017 шықәса ажьырныҳәа 1 инаркны амчра зауз Аџьазы азакәанеидкыла аусура атәы далацәажәо.
"Агәаҭарақәа мҩаԥысуеит хымзҟа инарзынаԥшуа. Аусураҭаҩцәа Аџьазы азакәанеидкыла ахәҭаҷ 52 инақәыршәаны адырра ҳарҭалароуп ирымоу авакансиақәа рзы. Административтә зинеилагарақәа рзакәанеидкыла инақәыршәаны Аџьазы азакәанеидгыла ахәҭаҷ еилазгаз аусураҭаҩцәа аштраф ршәароуп", — иҳәеит иара.
Асеиԥш иҟоу аинформациада Аџьеи аусура амазаареи, асоциалтә еиқәыршәареи рминистрра атәылауаа аусурҭаҭыԥқәа рзыԥшаара алшом иҳәеит иара.
Џьон Агрба иазгәеиҭеит аџьазы аҳәынҭқарратә инспекциа ишыҭнаҵаауа аԥсшьарамшқәа, асоциалтә ԥыжәарақәа, ачымазараз ашәҟәыбӷьыцқәа уҳәа аусзуҩцәа ишрырҭо.
"Сара макьаназы еилагарак аӡбахә смаҳацт. Ҳахәаԥшып. Аусурақәа уажәоуп ианрылага. Агәаҭаҩцәа рыштатқәа ирыцырҵарц аҳәара ҟаҳҵеит, избанзар агәаҭарақәа ареспублика ахы-аҵыхәа зегьы рымҽхаркуеит", — иҳәеит Агрба.
Џьон Агрба иҳәеит дарбанызаалак усзуҩык иусураҟны изинқәа ахьеиларгаз, ихәҭаа ахьирымҭаз азы аӡбарҭахь днеины дашшуа ҳәа шимаҳац.
"Усеиԥш хҭыск аҭыԥ аманы иҟазар, аминистрраҟны адырра ҳамазаарын", — иҳәеит иара.
Аусура амамзаара аганахь ала аџьазы азакәанеидкыла ҿыц аусура анхацнарк нахыс амчра ацәыӡит "Ауааԥсыра аусурҭа рымазаара" азакәан.
"Уаанӡатәи азакәан аҟны иарбан аусурҭа амамзаара закәу. Уажәы уи аҩыза атермин Аԥсны иҟам", — иҳәеит Агрба.
Жәларбжьаратәи аџьа аиҿкаара "аусура амамзаара" абасеиԥш еилнарккоит:
"15 шықәса инаркны 72 шықәса рҟынӡа зхыҵуа, аусура зылшоны иԥхьаӡо, аусура зҭаху, аџьа абиржаҿы ашәҟәы иану, аха аусурҭа змам ауаа" ҳәа.
"Иара абри аан Аԥсны аџьазы абиржа ыҟаӡам. Сгәы иаанагоит ҳекономика аизҳа-зыӷьара аиур уи аҩызагь ҟалап ҳәа", — иҳәеит Агрба.
Аџьазы азакәанеидкыла ҿыц иазыԥхьагәанаҭоит иреиҵаӡоу аулафахәы анхаралшара еиҵамкәа аҟазаара, аусзуҩы есышықәсатәи иԥсшьарамшқәа 30 мзартә мшы рынаӡара.
"Абиуџьет аҟны аус зуа рулафахәыеиҵа ашьақәыргылара Апарламент 2019 шықәса ажьырныҳәа 1 ахь ииаргеит ҳәоуп ишыздыруа", — иҳәеит иара.
Аџьазы азакәанеидкыла шьаҭаны иамоуп аусура аиура, мчыла аусрура аҟамлара, аусуҩ иԥсҭазаареи игәабзиареи аԥыжәара рыҭара. "Аԥсны Аҳәынҭқарра Аџьазы азакәанеидкыла аусура аларгаразы" азакәан Апарламент аҟны ирыдыркылеит 2016 шықәса цәыббрамзазы.
