АҞӘА, ажьырныҳәа 23 — Sputnik. Ашкол иақәлаз ҩымз ҳәа даанкылоуп Улан-Уде Октиабртәи араион аӡбарҭа аӡбарала. Абри атәы РИА Новости иазааицҳаит аӡбарҭа апресс-маӡаныҟәгаҩ Александра Поплавскаиа.
"Ацәгьоуҩы даанкылоуп ҩымз ҳәа, хәажәкыра 19 рҟынӡа", — иҳәеит иара.
Хҩык асабрадақәа рҿаҵаны Улан-Уде ашкол №5 иақәлеит. Акласс уадақәа руак амца зкуаз аԥаҭлыка ҩнарыжьит. Акласс уада амца акит.
Ахҭыс ҟалеит ашьыжь. Ашкол №5, аурыс бызшәеи алитературеи ркласстә уадаҿ абыжьбатәи акласаа аурок мҩаԥыргон. Ауада иҩнарыжьыз амца зкуаз аԥаҭлыка аныԥжәа амца аҽеимҿханакит. Арҵаҩи аҵаҩцәеи ауада иандәылҵуаз ақәылаҩцәа урҭ аахақәа рырҭон.
Мчыбжьык аԥхьа абри аҩыза ахҭыс аҭыԥ аман Пермтәи ашкол №127 аҟны. Усҟан аахақәа рыҭан 15-ҩык аҵаҩцәеи арҵаҩи. Ацәгьа руит ҳәа агәаанагара ззыҟоу аанкылоуп. Ашьаус хацыркын.
