АҞӘА, ажьырныҳәа 26 – Sputnik, Бадраҟ Аҩӡба. Аԥсны аамҭа-аамҭалатәи афымцарцәара мҩаԥысоу имҩаԥымсуоу Аԥсни Урыстәылеи реицәажәара иахьыԥшуп иҳәеит Sputnik Аԥсны аинтервиу азҭаз АУН "Амшынеиқәафымцамч" апресс-маҵзура аиҳабы Саид Барганџьиа.
"Иахьазы аиҳабырабжьаратә еинырра аҳәаақәа ирҭагӡаны аицәажәарақәа цоит. Ҳгәыӷуеит урҭ лҵшәабзиала ихыркәшахап ҳәа", — иҳәеит иара.
Саид Барганџьиа иазгәеиҭеит АУН "Амшынеиқәафымцамч" изныкымкәа аҳәамҭа шыҟанаҵахьо есышықәса афымцамч ахархәара еиҳа-еиҳа ишеиҳахо.
"Еиҳа иуадаҩу аамҭоуп аӡынра. Усҟан афымцамч ахархәара акыр иҳаракуп", — иҳәеит Барганџьиа.
Уи аҽақәыршәаразы иазырхиоуп еиуеиԥшым апланқәа.
